Naalakkersuisut: Akit qaffasinnerpaaffissaat qaangerneqarnavianngilaq

Akit qaffasinnerpaaffeqalernissaat aappaagu 2013-mi ukiortaamit aatsaat atuutilissaaq.

Ikummatissat imerpalasut akii  KNI-mit maannamut aalajangersarneqartut assigiinnassagaat Inatsisartunut ilaasortamut Kristian Jeremiassenimut Siumumeersumut Jens B. Frederiksenip akissuteqaammini erseqqisarpaa.
 
- Uuliamik tuniniaasartoq uuliap akisunerpaaffianit akisunerusumik tuniniaanavianngilaq, akerlinganilli akisunerpaaffianit akikinnerusumik tuniniaasinnaavoq, Jens B. Frederiksen oqarpoq.

Taassuma ilanngullugu oqaatigaa nunarsuarmi akit ineriartornerat assigiimmik akeqartitsinerup nalaanisulli uuliamik assartuinermi, toqqorterinermi siaruarterinermilu qaffattarnerat malillugu allannguuteqartassammata.

Akit qaffasinnerpaaffeqalerpata iluaqutaasussat  ilaatigut tassaanerarpai, soorlu unammilleqatigiinnermut oqartussaasut kissaateqarnerat, tassalu ikummatissanik tuniniaasartut ikummatissat assigiinngitsut akii appartissinnaassammatigit, soorlu ikummatissat assartorneqartarnerinut akitsuutip unammillissutigineqarneranni. 

- Kisianni tassa tuniniaasartut akit qaffasinnerpaaffiannit akisunerusumik tuniniaasinnaanngillat, Naalakkersuisut aalajangigaat akuerisaallu malinneqassaaq, Jens B. Frederiksen oqarpoq.

- Ataatsimut isigalugu, ikummatissanut akit qaffasinnerpaaffeqalerneratigut atuisunut iluaqutaasussaavoq, ingammik uuliamik tuniniaasartut arlaqarpata, Jens B. Frederiksen oqarpoq.