Naalakkersuisut akissuteqarnissaat suli utaqqivaat
Puisit amiinik Canadamit pisiortortarsimanermut tunngatillugu piaartumik misissuisoqarnissaanik Great Greenlandillu aqutsisuinut pingaartumik kinguneqartitsisoqarnissaanik, Inatsisartut Aningaasaqarnermut Ataatsimiititaliaa Naalakkersuisunut piumasaqaateqarpoq, sulili akineqarani. Piniarnermut Pisortaqarfik akisimavoq. Naalakkersuisut suli akissuteqarsimannginnerat pillugu Inatsisartut aningaasaqarnermut Ataatsimiititaliaata siulittaasua Ellen Christoffersen, Atassut, ima oqarpoq:
- Aalisarnermut Piniarnermullu Pisortaqarfimmiit ilisimatinneqarpugut, akissutisinissatsinnut piffissaq qinnuteqaatigisimasarput eqqorlugu akineqarsinnaanngitsugut ilaatigut Piniarnermut aalisarnermullu Naalakkersuisoq nunatta avataanut angalasussaammat, aammali tassunga atatillugu Piasortaqarfiup iluani kiisalu Great Greenlandip siulersuisuisa ulluinnarnilu aqutsisuisa iluanni misissungassat piffissap pineqartup iluani angumerineqarsinnaasimanngimmata.
Taama akineqarnertik sooruna naammiginanngitsoq Ellen Christoffersen erseqqissaavoq.
-Sooruna pitsaanerpaassangaluarpoq piffissaq eqqorlugu akisoqarsinnaasuuppat, kisianni illatungaani akineqanngiivinnermiit isumaga naapertorlugu pitsaaneruvoq. Taamaattumik qaqugu akineqarnissarput Aningaasaqarnermut Ataatimiititaliamiit eqeersimaaqqinnaarluta malinnaaffigissavarput.
Pisortaqarfiup akissutai aamma akineqarput piaarnerpaamik akineqaqqussutitalerlugit. Naalakkersuisullu akinngippata Aningaasaqarnermut ataatsimiititaliap suliaq malersoqqissagaa Ellen Christoffersen oqarpoq.
- Tullianik ataatsimiinnissarput sioqqullugu, tassalu januaarip 20-ani, akisoqanngiinnarpat, ataatsimiititaliami ilaasortat tamarmiullutik isummeqqittariaqalissapput. Suli skissuteqartoqarsimanngippat saaffiginneqqittariaqassaagut aammalu Inatsisartut Siulittaasoqarfiat aqqutigalugu Naalakkersuisut qinnuigisinnaavagut piaarnerpaamik akissuteqaqqullugit, piumasagullu allannguuteqanngillat.
