Naalakkersuisut akissarsiaat pillugu inatsit ukiaru atsaat aallanngussaaq

Naalakkersuisunut ilaasortat aningaasarsiaqartitaanerat pillugu inatsit allanngortinneqassasoq, Naalakkersuisut siulittaasuat Kuupik Kleist Atuagalliutini ukiarmi apersorneqarluni neriorsuivoq.

Kisianni inatsisip taassuma Inatsisartut siulittaasoqarfiata kisimi allanngortissinnaavaa. Siulittaasoqarfillu allannguutissatut siunnersuummik upernaaq manna saqqummiussinissamut piareersimasimanngitsoq, Kuupik Kleist nassuiaavoq.

- Inatsisartut Naalakkersuisullu aningaasarsiaqartitaanerat pillugit inatsit Inatsisartut Siulittaasoqarfiata akisussaaffigaa. Kisianni uagut Naalakkersuisuniit allannguutissanik siunnersuuteqassuugut, Siulittasoqarfimmut apuussassatsinnik.

INI-p ilaqutariinnut ataatsinut illuutaani affarleriinnilu ineqartut akiliutaat ukiortamiit 50 procentimik qaffapput.

Kuupik Kleistip oqarpoq, Naalakkersuisunut ilaasortat iniminnut akiliutissaannik naatsorsueriaaseq allanngortereeritsik, akiliut pisortat inissiaataanni ineqarnermut akiliutip 60 procentiatut angissuseqalersillugu.

Tassalu Naalakkersuisunut ilaasortat atorfiminnut atatillugu inigisaminnut siullermik takussutissaannarmik akiliiisarmata, akiliutaat 200 procent tikillugu qaffattut, Kuupik Kleist oqaluttuarpoq:

- Qaffaaneq naapertuunnerusumik pissuseqarnissamik tunngaveqarpoq. Kisianni aama naalakkersuisunut ilaasortat akiliutigisartagaat ukiuni 14-ini qaffaavigineqarsimanngillat . Taava aamma allatrut naatsorsuinissaq aalajangiupparput. Tassalu Naalakkersuisuni ilaasortaat ineqartitaanerminnut akiliutaat januaarip aallaqqaataaniit qaffangaatsiarput.

INI-p inissiaataanni akiliutit qaffanneqalermata, ukiarmi oqallittoqaleqaaq. Tassami 300.000 koruuninik aningaasaliinikkut Naalakkersuisunut ilaasortat

akiliutimikkut qaffaaffigineqanngillat.

Tamanna pissuteqarpoq, taakkua aningaasarsiaqartinneqarnerannut inatsit nalillugu akiliisarmata.

Kisianni aningaasaliissutit 300.000 koruunit ullualuit qaangiutiinnartut Naalakkersuisut atorniarunnaarpaat, tassalu iniminnut akiliutaat ukiortaamiit qaffapput.

Inatsisartunut Naalakkersuisunullu ilaasortat aningaasarsiaqartinneqarnerannut inatsit ukiaru allanngortinneqassasoq Kuupik Kleistip naatsorsuutigaa. Taava kalaallinik politikerinik isiginneriaaseq allanngussasoq neriuutigaa:

- Assersuutigalugu politikerit tassaasut iluanaarniutigalugu politikeriusut. Nipilu tamanna oqallinnermi qatsunnarsisarpoq allanngortikkusunnartorujussuusarluni.

Inatsisartut siulittaasuat Naalakkersuisut siulittaasualluunniit atorfimminnut atatillugu inigisaminnut akiliineq ajorput. Tamannalu allanngortinneqassasoq Kuupik Kleistip naatsorsuutiginngilaa.

INI-p ilaqutariinnut ataatsinut inissiaataaannut affarleriinnullu akiliutut ukiuni arlalinni qaffanneqarsimasimanatik aatsaat iluarsineqarnikupput.