Naalakkersuisut akileraarut appartinniaraat

Naalakkersuisut nunamut tamarmut akileraarut 1 procentimik 2013-imiit appartinniarpaat. Aningaasarlersornissaa anguniarlugu ilaatigut ernianut ilanngaataasartoq appartinniarneqarpoq. Inatsisartuniit allannguut akuerineqassappat qanoq akileraartigisalersinnaanersutit nittartakkakkut kisissinnaanngorpat.
Allattoq Pipaluk Høegh
septembarip 26-at 2012 13:17

Naalakkersuisut nunamut tamarmut akileraarutaasartoq massakkut 11 procentiusoq 2013-imiit 10 procentimut appartinniarpaat. Akileraarummik appaaneq akissaqartinniarlugu  Naalakkersuisut ilaatigut ernianut ilanngaatasartup 10 procentimik appartinnissaa sulissutigaat.

Ernianut ilanngaataasartup innuttaasut akileraarnerminni appaaffigineqarsinnaanerannik ammaassisuuvoq, soorlu aningaaserivinnut akiitsoqarnermi erniat akiligassaritinneqartartut inuit akileraarutigisassaannut apparsaataasartut. Massakkut ernianut ilanngaataasartoq 100 procentiuvoq, Naalakkersuisulli tamanna 2013-imiit 90 procentimut appartinniarpaat. Kingunerissavaa inuit amerlanngitsut akileraarnerusalernerannik. Kisianni akileraartartut amerlanerpaartaat nunamut tamarmut akileraarut appartinneqariarpat akileraartarnerat appassaaq.

Nammineerlutit nittartagaq ikiorsiullugu kisissinnaavat 2013-imi qanoq annertutigisumik akileraarutinut akiliissanerlutit, Inatsisartuniit akileraartarnermut allannguutit akuerineqassappata. Akileraartarnermut Aqutsisoqarfiup akileraartarnermut allannguutit inunnut ataasiakkaanut aningaasatigut qanoq kinguneqarsinnaanersoq takutinniarlugu nittartakkamik akileraarnissamut kisitsinissamut atugassamik sanapput. Piumaguit aamma oqarasuaatikkut Akileraartarnermut Aqutsisoqarfik saaffigalugu danskisut kalaallisullu siunnersortissinnaavutit.

2013-imi akileraarutigisinnaasatit naatsorsorusukkukkit nittartakkami kanani ataani allassimasumi naatsorsuiffissaq takusinnaavat.

https://aka.nanoq.gl