Naalakkersuisut akerliussutsimik takutitsiffigineqarput
Inatsisartunut qinerseqqinnissamik kissaateqartut, 100-jut sinneqartut Nuummi illoqarfiup qeqqanit Inatsisartut ataatsimiittarfiata tungaanut ullumi ingerlaaqatigiipput.
Akerliussutsimik takutitsisut oqalugiareernerisa kingorna, qinerseqqinnissamik kissaateqartut atsiorneri 1.608-it, Naalakkersuisut siulittaasuannut tunniunneqarput. Atsiornernik 1.608-nik tunniussisuuvoq, akerliussutsimik takutitsinissamik suleqataasoq, Giiti Tittussen.
Inatsisartunut qinerseqqinnissamik piumasaqartut akerliussutsimik takutitsinerat aallartippoq, Nuup qeqqanit Inatsisartut ataatsimiittarfiata tungaanut ingerlaaqatigiittoqarluni.
Peqataasut ilaata, Bente Hedelundip akerliussutsimik takutitsinerup qanoq pingaaruteqartiginera ima oqaatigaa.
- Isumaqarama Naalakkersuisut inuiaqatigiinnut toqqissisimananngitsumik aqutsisut, akerliussutsimik takutitseqataavunga. Aamma malunnartumik innuttaasut neriuuteqalersimagaluartut maanna neriuutaarunnerisimaneri pillugit akerliussutsimik takutitseqataavunga, Bente Hegelund oqarpoq.
Akerliussutsimik takutitseqataasoq alla, Marianne Jensen isumaqarpoq, Nunatta naalakkersuinikkut aqunneqarnera oqaluttuarisaanermi aatsaat taama torinngitsigisumik aqunneqalersimasoq. Marianne Jensen ima nangilluni radioaviisimut oqarpoq.
- Uanga naammatsittunut aamma ilaagama, akerliussutsimik takutitsinermut peqataanissara qinerpara, Marianne Jensen oqarpoq.
Akerliussutsimit takutitsisut Inatsisartut ataatsimiittarfiata silataani oqalugiaqattaareersullu, Naalakkersuisut siulittaasuat, Aleqa Hammond akissuteqarluni ilaatigut ima oqalugiarpoq.
- Kukkusuitsuunngilagut aamma allatulli aqqusaagaqartarougut, tamakkuli kukkussutigut ilikkartarpavut. Taamaattumik oqariartuutissinnut uparuaatissinnullu qujavunga. Atsiornerpassuit tunniunneqartut pingaartorsiutigalugit tiguakka.
Naalakkersuisut siulittaasuata, Aleqa Hammondip oqalugiareernerani, akerliussutsimik takutitsinermi suleqataasoq, Giiti Tittussen aperaara Naalakkersuisut siulittaasuata oqalugiaataani suna pingaarnerpaanersoq. Giiti Tittussen tamatunnga ima akivoq.
- Tassa massakkut neriorsuivoq, Naalakkersuisunik akerliusoqarnera tusaaneqassasoq, tassalu tamannarpiaavoq uanga nammineerlunga angorusutara, akerliussutsimik takutitsinermi suleqataasoq, Giiti Tittussen taama oqarpoq.
