Naalakkersuisut: Aatsitassanut Pisortaqarfik aggulunneqassanngilaq
Aatsitassanut pisortaqarfimmi oqartussaaffiit siammarterneruneqarnissaannik oqallisissiatut siunnersuut inatsisartut ukiaanerani ataatsimiinneranni oqallisissiatut saqqummiunneqassaaq.
Aatsitassat pillugit pisortaqarfiup immikkoortunut aggulunneqarnissaanik Naaja Nathanielsenip isumaa Ove Karl Berthelsenip isumaqatiginartinngilaa. Naaja Nathanielsen isumaqarpoq, pisortaqarfiup aggulunneqarneratigut, pisortaqarfiit arlaannaannulluunniit attuumassuteqanngitsuuneq qulakkeerneqassasoq , susassaqarfiillu assiigiinngitsut assigiimmik tulleriaarneqartassammata, soorlu avatangiisit pilugit immikkoortortaqarfik immikkoortilerlugu.
- Isumaqanngilanga, aaqqissuussineq nukittooq aammalu ingerlalluartoq arlaannik aggulullugu nukilaassassallugu uagut Naalakkersuisuni pisussaaffeqartugut, Ove Karl Berthelsen taamatut oqarpoq.
Taassuma ilanngullugu oqaluttuaraa Naalakkersuisoqarfimmi suleqatigiissitamik aallartitsisoqartoq, avatangiisinut immikkoortortaqarfiup Aatsitassanut pisortaqarfimmiit avissaartinneqarnissaannik misissuisussamik, taassumalu sulinera 2013-imi naammmassissasoq Ove Karl Berthelsenip oqaatigaa.
Aatsitassarsiorniarnermi misissueqqissaarnernut akuersissutinullu inatsisartut tusarniaaffigineqarnermikkut akuutinneqartalernissaat Naaja Nathanielsenip oqallisissiami aamma saqqummiutissavaa.
Ove Karl Berthelsen isumaqarpoq inatsisartut tusarniaqqaarneqartalissappata naalakkersuisut akisussaaffiinik annikinnerusumik tunineqassasut.
- Naalakkersuisut akisussaaffimmik annikinnerusumik aamma tunineqaqqinnissaat naleqquttutut ippallaanngitsoq isumaqarpunga. Kisianni oqallisigineqarli, taava nalilersorneqaruni qanoq isummerfigineqarumaarpoq. Ove Karl Berthelsen taamatut oqarpoq.
Aatsitassanut oqartussaaffeqarnerup Namminersorlutik Oqartussanit tiguneqarnerata kingorna aalajangiisarnerit Naalakkersuisut tiguuaat.
Naaja Nathanielsenip Inatsisartuni oqaluuserissassatut siunnersuutai, novemberip ulluisa arfineq-pingajuanni oqaluuserineqassapput.