Naalakkersuisut Aasiannut misissuiartortitsipput

- Paasigakku ajornartorsiutit qanoq annertutiginersut, aalajangerparput teknikerinik aasiaannukartitsissalluta.Tassani paasissavarput ulluni qaninnerni, arlaatigut massakkorpiaq iliuuseqartoqarsinnaassanersoq. Ineqarnermut Naalakkersuisoq Jens B. Frederiksen, taama oqarpoq.

INI A/S -imiit ulloqeqqaanerani radioaviisimut oqaatigineqarpoq, Aasianni illoqarfiup immikkoortortaata ilaani, inissianik attartortut naammagittarlutik imermik naammattumik uunartoqanngikkallarlutillu kiassaatinilu kissartoqarpianngikkallartariaqartut. Tassani najugaqarfiup kiassarnermut atortuisa taarsersornissaannut akissaqannginneq peqqutaalluni.     

Jens B. Frederiksenilli ilisimatitsissutigaa, Naalakkersuisut iluarsartuussinissamut aningaasanik illikartitsisoqarnikuusoq. Taannalu najugaqarfik pineqartoq misiliutitut iluarsartuussinissamut pilersaarummi ilaanerarpaa.

- Pilersaarusiornikuuvugut, inissiat illoqarfinni sorlerni suut suliarineqassanersut suullu nutarterneqassanersut. Taakkulu inissiat Aasianniittut eqqaaneqartut, pilerssaarutinut ilaapput. Taanaappat misissuinerit takutissappagu, nutarterneqarnissaa imminut akilersinnaassasoq, taava ukioq manna nutarterineq aallartinneqassaaq. Ineqarnermut Naalakkersuisoq, Jens B. Frederiksen oqarpoq.

Ineqarnermulli Naalakkersuisup aamma erseqqissarpaa, inissiat pitsaasusaat inimullu akiliutit imminnit avissaartinneqarsinaanngitsut:

- Uanili suliassami soqutiginartoq tassaavoq, ersarittorujussuarmik takutippaa ukiorpassuit ingerlanerini aserfallatsaaliinermut aningaasat immikkoortinneqartartut ikippallaarujussuartut. Taamaammat pingitsoorata siunissami, aningaasat naammannissaat isumagisariaqarparput. Ineqarnermut Naalakkersuisoq Jens B. Frederiksen, taama oqarpoq.