Naalakkersuisut aalisartunut ikiorsiissutissanik atuutilersitsilersut
Aalisartunut ikiorsiissuteqartoqarnissaa piffissami sivitsortumi nalornissutigineqareerluni maanna inissinneqarpoq.
- Nunami inuussutissarsiutit ilaat kisimik COVID-19-mit eqqugaanngillat – aammali sinerissap qanittuani aalisarneq eqqugaavoq.
- Taamaammat sinerissap qanittuani raajarnianut, saattuarnianut saarullinnianullu sammititamik aningaasaqarnikkut ikiorsiissutinik pilersitsinissaq Naalakkersuisut aalajangerpaat, Naalakkersuisut tusagassiuutinut allapput.
AAMMA ATUARUK KNAPK: Aalisartut coronap ajornartorsiortitsinerata nalaani aningaasatigut ikiorneqartariaqarput
Naalakkersuisulli aalisakkat apiisa apparnerat tamakkerlugu matussusiinianngillat. Aalisartut annaasaqarnermi aamma annaasaqassapput.
Tunisinermi akit siorna akinut naleqqiullugit qanoq appartigisimanerat aallaavigalugu tapiisoqassaaq.
Assersuutigalugu akit 15 procentimik apparsimappata, aalisartut annaasatik tamaasa namminneq matussusissavaat, tassalu Naalakkersuisunit aningaasatigut taperserneqassanngillat.
Juulimi akit
Raajat, saattuat saarulliillu akii coronap ilungersunartorsiortitsinerani appariartorput. Naatsorsueqqissaartarfik naapertorlugu raajat saarulliillu akii apparnerupput.
Naatsorsueqqissaartarfiup nalunaarusiaa naapertorlugu raajat kiilumut akii juulip qaammataani siorna piffissamut tassunga sanilliullugit 11,3 procentimik apparput.
Saarulliit kiilumut akii 10,1 procentimik apparput.
Naalakkersuisut sinerissap qanittuani aalisartunut ikiorsiissutaat kingumoortumik aggustip aallaqqaataaniit 2020-mi decembarip 31-ata tungaanut atuutissapput.
Inuussutissarsiutinut ikiorasiissutit sivitsorneqartut
Naalakkersuisut aamma inuussutisarsiutinut ikiorsiissutit decembarip 31-ata tungaanut sivitsorpaat.
- Inuussutissarsiortunut ikiorsiissutit kiisalu takornariartitsinermik inuussutissarsiortunut ikiorsiissutit taamatullu immikkut ittumik ikiorsiissutit ulloq 1. oktoberimit 31. december 2020 ilanngullugu sivitsorneqarnissaat Naalakkersuisut aalajangerpaat, tusagassiuutinut nalunaarummi allassimavoq.
AAMMA ATUARUK Coronaqarnerani ikiorsiissutit septembarimi atorunnaassasut
Inuussutissarsiutinut ikiorsiissutit septembarip ulluisa 30-annit atorunnaariartortussaagaluarput, aningaasaqarnermullu naalakkersuisup, Vittus Qujaukitsup (NQ) taakku sivitsoqqinneqarnissaat naatsorsuutiginngikkaluarpaa.
Tamanna Naalakkersuisut aappaagumut aningaasanut inatsisissatut siunnersuutaannik saqqummiinerminut atatillugu oqaatigaa.
Tassanilu inuussutissarsiutinut ikiorsiissutit sivitsorneqassanngikkunik coronap ilungersunartorsiortitsinerata nalaani aningaasartuutit 595 millionit koruuniunissaat tassani saqqummiunneqarpoq.
- Inuussutissarsiornermik ingerlataqartunut ikiorsiissutit piffissap ingerlanerani ataavartumik suliniutinngortussaannginerat erseqqissassallugu Naaalakkersuisut pingaartippaat, Naalakkersuisut allapput.
