Naalakkersuisussat aqagu avammut tusarliunneqassapput

Aqagu tamatta utaqqisarput paasinarsissaaq; tassalu kikkut naalakkersuisunngussappat? Qularnanngilarli inuit taakku partiit Atassut, Siumut aamma InuitAtaqatigiit akornanni nasassarineqartussaasut.

Utaqqinitsinnili, Namminersornerulernitta kingornaa siullermeersumik partiit pingasut naalakkersuisunngortitseqatigiilernerannut pisut uterfigilaariartigit:

Qinersineq sioqqullugu missingersuinerit kukkusumik eqqoriaanerusimasut qinersinerup unnukkuani qinersinerullu aqaguani paasinarsivoq.

Naatsorsuutigineqareersutut demokraatit siuariarput, kiasiannili Inuit Ataqatigiit isertitaat naatsorsuutigisamit ikinnerummata, amerlanerussuteqarlutik Demokraatillu nunatsinni siuttungorsinnaanerigaluat maangaannarpoq.

Atassut naalakkersuisunngortitsinissami aalajangiisunngoriasaarpoq Siumumillu suleqateqarnissaminnik ammaassillutik. Kingusinnerusukkut Inuit Ataqatigiit Siumumik isumaqatiginninniarnissamut soqutiginnilerput, naak qineqqusaarnerup naalernerani Josef Motzfeldtip Siumumukkormiunik suleqateqarsinnaanginnermik nalunaaruteqareeraluarluni.

Qinersereernerup kingorna isumaqatigiinniarnerit partiinit pingasunit peqataaffigineqartut aallartinneqarput, isumaqatigiissutillu toqqammavigissaa sapaatip akunnera una inissinneqarluni. Siullermilli meeqqanut inuusuttuaqqanullu suliniutissat isumaqatigiinniassutigineqarput.

Tamanna naammassiinnartoq allamik akimmiffissaqalerpoq. Siumut naalakkersuisoqarfinnik arfineq-pingasuusunit; sisamat piumasarilerpaat. Inerneralu Inuit Ataqatigiit Atassullu tamarmik marlunnik naalakkersuisuutitaqalernissaat Josef Motzfeldt-imit naammagineqanngilluinnarpoq.

Siumulli piumasani pivaa, ippassarlu naalakkersuisoqarfiit agguataarneqarneri tusarliunneqarlutik.

Siumukkormiut naalakkersuisoqarfiit uku tigusuusaangorpaat:

Naalakkersuisunut siulittaasoqarfik, Kulturimut – Ilageeqarnermut Ilinniartitaanermullu Naalakkersuisoqarfik, Ineqarnermut – Attaveqarnermullu Naalakkersuisoqarfik kiisalu Ilaqutariinermut Naalakkersuisoqarfik.

Inuit Ataqatigiit Aningaasaqarnermut Peqqinnissamullu Naalakkersuisoqarfiit tigussavaat, Atassutikkormiut Aalisarnermut Inuussutissarsiornermullu Naalakkersuisoqarfiit tigussallugit.

Isumaqatigiinnginnerit saammaateqatigiinnermik taarserneqarlutik naalakkersuisunngortitsinissamut isumaqatigiissut maanna atsiorneqarnissamínut piareerpoq.

Naalakkersuisunngortitseqatigiinnissamut isumaqatigiissut aqagu marlunut atsiorneqarpat kikkut naalakkersuisunngorumaarnersut naalakkersuisut siulittaasuata Hans Enoksen-ip saqqummiutissavai.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat