Naalakkersuisussanik ualeru tusarliussisoqassaaq
Kikkut aalisarnermut piniarnermullu aamma ineqarnermut attaveqarnermullu naalakkersuisunngussanersut ualeru tusarliussinnaassallugit, naalakkersuisut siulittasuata Hans Enoksenip naatsorsuutigaa.
Naalakkersuisut siulittaasuat Siumumeersoq Hans Enoksen tusagassiortunik katersortitsinissamik pilersaaruteqanngilaq, ualeruli nalunaaqutaq sisamat missaanni tusagassiutitigut nalunaaruteqarumavoq.
- Massakkut ulapikkama piffissaqanngilanga. Naalakkersuisut siulittaasuat ulloqeqqata siornatigut taama oqarpoq.
Hans Enoksen aamma oqarpoq, inatsisartut aatsaat septemberip 23-ani ataatsimiilissammata tusarliussinissani utaqqimaarneqarsinnaasoq, ualeruli tusarliussisinnaanissani naatsorsuutigalugu.
Aamma immiunneqarumanngilaq, annerusumillu oqaaseqarumanngikkallarluni.
Ineqarnermut Attaveqarnermullu Naalakkersuisuusimasoq Jens Napãtok´ aamma Aalisarnermut Piniarnermullu Naalakkersuisuusimasoq Rasmus Frederiksen naalakkersuisutut aasap ingerlanerani tunuarput, ilassinnissutinik atuivallaarsimanertik pissutigalugu.
Naalakkersuisoqarfiillumi taakku inuttalerneqarnissaat oqaluuserineqarsimaqaaq aamma Siumumi ilaasortat akornanni.
Siumukkormiut ilaat naalakkersuisut siulittaasuannik tatiginnikkunnaarlutik qinerseqqusisimapput, allalli aappaagu qinersisoqartussaareermat ikerinnakkut qinerseqqusinngillat akisuallaassanerarlugu. Taamatuttaaq naalakkersuisooqatigiit Inuit Ataqatigiit naalakkersuisooqatigisap naalakkersuisunngortitassaanik aalajangersaaqataanissaminnut piumasaqarsimagaluarput, kingullertigulli naalakkersuisussanik suaarutiginninnginnermi ilisimatinneqarumasimallutik.
Kikkut naalakkersuisunngortinneqassanersut aamma oqaluuserineqangaatsiarsimavoq, Radioavisimillu Siumukkormiut nuiamanerit arlallit oqaloqatigisimavavut, amerlanerpaartaalli naalakkersuisunngorusunnerlutik aperineqassagaluarunik itigartitsiumasimapput.
Oqaloqatigisatta aamma ilaata aalisarnermut piniarnermullu naalakkersuisoqarfimmik Hans Enoksenimit neqeroorfigineqarnini itigartissimavaa.
Ualeruli tamakku tamarmik paasinarsissapput, naalakkersuisut siulittaasuata naalakkersuisussatut inassutigisassaminik tusarliusseriarpat, Radioavisimilli paasisavut naapertorlugit naalakkersuisunngortussap aappaa inatsisartuni ilaasortaanngilaq.
