Naalakkersuisussanik suli tusarliussisoqanngilaq

Naalakkersuisut siulittaasuat Siumumeersoq Hans Enoksen naalakkersuisunut ilaasortassanik nutaanik suli tusarliussaqanngilaq, aningaasanut inatsisissap aappaagumoortup partiinut naalakkersuisunut illua´tungiliuttunut tamanut isumaqatigiinniutigineqarnera suli naammassinngimmat.

Aningaasanut inatsisissaq aappaagumoortoq partiinut naalakkersuisunut illua´tungiliuttunut isumaqatigiinniutigalugu, naalakkersuisut siulittaasuata tulliata Aningaasanullu Naalakkersuisup Inuit Ataqatigiinneersup Josef Motzfeldtip manna tikillugu ulapputigaa. Isumaqatigiinniarnerillumi taakku naammassitinnagit, naalakkersuisunut ilaasortassatut Inatsisartunut inassutigisassaminik tusarliussinaviarnani, naalakkersuisut siulittaasuat Hans Enoksen oqareerpoq.

Aalisarnermut Piniarnermullu Naalakkersuisuusimasup Rasmus Frederiksenip aamma Ineqarnermut Attaveqarnermullu Naalakkersuisuusimasup Jens Napãtuup naalakkersuisuuffigisimasaat inuttalerniarneqarput. Kikkullumi naalakkersuisunngussanersut oqallisigineqarsimaqaaq, naalakkersuisullu siulittaasuata avammut tusarliussinissani marloriarluni kinguartereersimavaa, kingullertigut tunngavilersuutigalugu, aningaasanut inatsisissap isumaqatigiinniutigineqarnera naammasseqqaartariaqarnerarlugu.

Josef Motzfeldt nalunaaqutaq tallimat qaangeraa oqaloqatigaarput, erseqqissaavorlu, isumaqatigiinniarnerit ataqqeqatigiilluni ingerlanneqartut, isumaqatigiissutissarlu tamarmik isumaqatigiissutigisinnaasaat aqagu ulloqeqqata siornatigut naammassissasoq.

- Manna tikillugu tamatsinnut isumaqatigiissutaasinnaasutut isikkulik naammassilerparput, atsioqatigiinnissarlu tullinnguuppoq. Soorunami isumaqatigiinniarnerit allatulli ittut assigalugit tamatta pilliuteqartarlutalu pissarsisoqartarpoq, isumaqatigiissutissarli tamatsinnit akuerineqarsinnaasutut isikkulik naammassilerparput. Josef Motzfeldt oqarpoq.

Naalakkersuisut siulittaasuat Hans Enoksen naalakkersuisunngortussanik tusarliussinissaminik kinguartitsisimanersoq paasiniarlugu Radioavisip unnummut nalunaaqutaq arfineq-marluk qeqqanut aallartinnissaa allaat tikillugu oqaaseqartinniaraluaratsigu iluatsinngilarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat