Naalakkersuisussanik marlunut tusarliussisoqassaaq

Siumup naalakkersuisuugallartullu siulittaasuata Hans Enoksenip naalakkersuisunngortussat kikkuuneri kulturikkut illorsuatsinni Katuami Nuummiittumi ualeru nalunaaqutaq marlunut tusarliutissavai.

Taamatuttaaq Siumup, Inuit Ataqatigiit Atassutillu isumaqatigiissutaat saqqummiunneqassaaq.

Sulisitsisut Peqatigiiffiata GA-p eqqoriaanera naapertorlugu Siumup siulittaasua Hans Enoksen naalakkersuisut siulittaasuattut ingerlaqqissaaq, parteeqataalu Jørgen Wæver Johansen ineqarnermut attaveqarnermullu naalakkersuisunngussangatinneqarpoq, aamma Doris Jakobsen kulturimut, ilageeqarnermut ilisimatusarnermullu kiisalu Aleqa Hammond ilaqutariinnermut naalakkersuisunngussangatinneqarput.

Inuit Ataqatigiit siulittaasuat Josef Motzfeldt aningaasanut nunanullu allanut naalakkersuisunngoqqissagunarpoq, parteeqataalu Asii Chemnitz Narup peqqissutsimut naalakkersuisutut ingerlaqqissagunarluni.

Atassutip siulittaasua Finn Karlsen inuussutissarsiornermut, sulisoqarnermut nunalerinermullu naalakkersuisunngussangatinneqarpoq, parteeqataalu Siverth K. Heilmann aalisarnermut piniarnermullu naalakkersuisunngussangatinneqarluni.

Siumumeersoq Jonathan Motzfeldt Inatsisartut siulittaasuattut ingerlaqqissagunarpoq.

Naalakkersuisooqatigiilersussat inatsisartuni amerlanerussuteqarluarput, tassa Siumut, Atassut Inuit Ataqatigiillu inatsisartuni inissani 31-ni 23-t pigamikkit. Kalaallit Nunaata oqaluttuarisaanerani siullermeersumik partiit pingasut Naalakkersuisooqatigiilissapput.

Katuami tusarliussineq KNR-TV-kkut toqqaannartumik aallakaatinneqassaaq.