Naalakkersuisup sapaatip akunneranut sulinikinnerulernissaq ammaffigaa sumiilli aningaasalernissat tikkuussinngilaq

​Suliffeqarnermut naalakkersuisup, siumumeersup Jess Svanep nunatsinni sapaatip akunneranut akunnerit suliffiusartut ikilisinneqarnissaat ammaffigaa.

- Tassa Inatsisartut peqqusippata Naalakkersuisut uunga suliaqaqqulluta qulaajaanissamut, taassumalu atuutsinneqalissappat, atuutsinneqalernissaanut siunnersuummi saqqummiussaqaqqulluta, taanna soorunami suliarissavarput.

Savalimmiuni naalakkersuisut nutaat, Javnaðarflokkurininit, Tjóðveldinit Framsókninit peqataaffigineqartut Savalimmiuni sapaatip akunneranut akunnerit suliffiusartut akunnernit 40-nit 37-nut ikilisinneqarnissaat naalakkersuisoqatigiinnissamut isumaqatigiissummi atsiorpaat.

Savalimmiuni naalakkersuisut isumaqatigiissut naammassissagunikku nunarput nunani avannarlerni kisiartaalluni sapaatip akunneranut akunnerni 40-ni suliffiusartunngussaaq.

Nunatsinnili aamma taamaattoqarsinnaanissaa mattuteqqanngitsoq, Jess Svane isumaqarpoq.

- Soqutiginarpoq, Naalakkersuisuniillu apeqqut soqutigilereerparput. Naalakkersuisunit isumaqarpugut sulineq toqqissisimasumik sinaakkuteqassasoq suliffimmilu avatangiisigissaassasoq, taanna oqarpoq.

Illuatungiliuttut apeqqut taanna soqutigilluinnarpaat.

Demokraatit

Anna Wangenheim Demokraatineersoq nunatsinni sapaatip akunneranut sulisarnerup annikillisinnissaanut piffissami sivisuumi oqaluuserinnittuuvoq.

- Nunatsinni allanit qanoq sunniiveqatigiittoqarsinnaanitta piffissallu suliffiusussat ikilisinneratigut qanoq iluaquteqarsinnaanitta misissornissaa soqutinartuussasoraara, Anna Wangenheim oqarpoq.

Anna Wangenheimip oqarnera naapertorlugu sapaatip akunneranut sulisarnerup annikillisinneqarnera atugarissaarnerulernermik pilersitsillunilu innuttaasunut suliffissaqartitsilissaaq. Tamannalu nunatsinni napparsimalluni sulinngitsoornerpassuarnut iluaqutaassalluni.

- Suliffeqarsinni atugarissaarnerulersitsinissamut qulakkeerutaassaaq, taamaalilluta napparsimalluni sulinnginnerpassuit ikisisassallutigit, taanna erseqqissaavoq.

Aningaasalli suminngaanniit matussuserneqassanersut erseqqivissumik oqaatigisinnaanngilaa.

- Piffissap suliffiusussap annikillisinneratigut oqartussat napparsimalluni sulinngitsoornerpassuarnut akiliisarunnaarnissaannik tamanna kinguneqassanersoq aperisoqarsinnaavoq. Aningaasat tassannga ilaatigut pissarsiarineqarsinnaapput, taanna oqarpoq.

Aningaasat qanoq matussuserneqassappat?

Pisortat suliffeqarfiinnaani sapaatit akunnerannut akunnerit suliffiusartut akunnernut 35-nut ikilissinneri 460 millionit koruunit missaannik naleqassasoq, Aningasaqarnermut Naalakkersuisoqarfiup 2020-mi missingiutitut kisitsinerata takutippaa.

Naalakkersuisup, Jess Svanep oqarnera naapertorlugu aningaasat suminngaanniit matussuserneqarnissaat pingaarnerpaanngilaq.

- Inuup annerusumik qasueqqalluni tunniussaqarnerulersinnaanera aningaasat uterteqqinnissaanik kinguneqartuaannartoq ilisimavarput. Taamaammat aningaasat sumi aaneqarsinnaaneranik eqqarsarani kisiannili inuup sumik tunniussaqarsinnaanera taanna uagut qitiutinneqassasoq takorloorparput, taanna oqarpoq.

Naalakkersuisut piffissami suliffiusartumik annikillisaanissamik aallartitsissappata tamanna innuttaasut aningaasarsiaanut sunniuteqarnavianngitsoq, Jess Svane nassuiaavoq.

- Taamaattoqassanngilaq, suliffeqarfiit aaqqissuunneqarneranni innuttaasut isertitaminnik annaasaqarnissaat Naalakkersuisut iliuusissarinngilaat, taanna oqarpoq.

Anna Wangenheimillu piffissap suliffiusartup annikillisinnissaa qanoq akeqassasoq aalajangersimasumik oqaatigisinnaanngilaa, tamannali akisussasoq ilimagaa.

- Aamma aningaasat sumit pissarsiarineqarnissaata oqaluuserinissaanut soqutiginnippunga. Susassaqarfippassuarni nutaanik aaqqissuusseqqiffiusariaqartuni akissaatitigut kinguleruttooqqavugut, taanna oqarpoq.

Iluaqutissat ajoqutissallu
Politikerit taakku marluullutik aalajangersimasumik siunnersuuteqartoqannginnerani misissueqqaartoqartariaqartoq isumaqatigiissutigaat.

Piffissalli suliffiusup annikillisarnera aamma ajoqutissartaqarpoq.

- Ulloq unnuarlu paaqqutarinniffiit utoqqaallu angerlarsimaffii eqqarsaatiginngitsoorsinnaanngilakka. Piffissaq suliffiusussaq annikinneruguni taava amigaataasut matussuserneqartariaqarput, Jess Svane oqarpoq, nangillunilu:

- Sapaatip akunneranut akunnerit 37-naat suliffiusarnerata ajoqutissartai paaserusuppagut. Assersuutigalugu sulerulunnerusoqalernissaanut atatillugu.

Misissuineq taamattoq Anna Wangenheimip aamma taperserpaa.

- Suliffeqarnermi illuatungeriit tamarmik tassani suut iluaqutaasinnaanersut ajoqutaasinnaanersullu pillugit oqaloqatigiissuteqarnissaat pingaaruteqarpoq. Misissuineq taama ittoq nunatsinni aallartinneqarnikuunngilaq. Tamanna aallartittariaqaripput isumaqarpunga, taamaalilluta suliffimmi atugarissaarnerulernissamut pitsaanerusunik aaqqiissutissarsisinnaassalluta.

Piffissaq suliffiusartoq annikillisinneqassappat tamanna nunatsinni innuttaasunut tamanut atuutissasoq, Jess Svanep erseqqissaatigaa.