Naalakkersuisup pisuutitsiniarnerit tunngavissaqannginnerarpai
-Kommuneqarfik Sermersooq Aningaasanut Inatsimmi kommuuninut allanut naleqqiullugu amerlanerpaanik aningaasaliiffigineqareerpoq, Jens-Erik Kirkegaard nassuiaavoq, nangipporlu:
-Naalakkersuisut tamarmiulluta kommuunini kina borgmesteriunersoq apeqqutaatinnagu nunarput tamaat sullipparput aamma maluginiagassaavoq nunatta karsianit Kommuneqarfik Sermersooq kommuuninit allanit naleqqiullugu aningaasanik amerlanerusunik aningaasaliiffigineqarsimammat. Taamaattumik unnerluusserpalaarnermik nipi sakkortunerpaamik utertinneqartariaqarpoq.
Kommuneqarfik Sermersuup borgmesteria Inuit Ataqatigiinneersoq Asii Chemnitz Narup Radioaviisimut ippassaq oqarpoq kommuunit sinneri Siumukkormiunik borgmesteriutitaqarmata pitsaanerusumik pineqarsimasut.
-Siullermiilinnginnatta kommuunit allat Siumukkormiunik borgmesteriutitaqarnerat malugisarlugu. Uagut kommuunitsinni partiit katitigaanerat allaavoq, tassani Inuit Ataqatigiit siuttuupput. Sooruna uagut allatuulaartumik pineqalaartuaannaavittugut, taanna apeqqut nipituumik apeqqutigisariaqalerlugu misigisimavunga. Uangaannaanngilaq, kommunalbestyrelsemili ilaasortat qassit taama eqqarsalerpat, Asii Chemnitz Narup oqarpoq.
Aamma oqarpoq Kommuneqarfik Sermersuumi suliffissaaleqisut kommuuninut allanut naleqqiullugit amerlanerummata Naalakkersuisut immikkut ittumik suliniummut 174,2 million koruuninit 34,1 million koruuninik Kommuneqarfik Sermersuumut aningaasaliissutissateqarnissamik siunnersuutaat ikippallaarujussuartut.
Naalakkersuisoq Siumumeersoq Jens-Erik Kirkegaard erseqqissaavoq kommuunit pisariaqartitsinerat naapertorlugu aningaasaliissutissanik amerlassusiliisimallutik:
-Aningaasaliissutit nikingassuteqanngillat. 200 million koruunit sinnerlugit Kommuneqarfik Sermersuumut aningaasaliissutigineqarput, kommuuni taanna sanaartugassanut aserfallatsaaliinermullu atugassanik amerlanerpaanik pivoq. Taamaalilluni sukkut kingulliutinneqarnersoq paasiuminaappoq.
Kommuneqarfik Sermersuup nassuiaanneqarnissaminik ataatsimeeqatiserinninneranillu piumasaqarnera Naalakkersuisup Jens-Erik Kirkegaardip aamma ilassilluarnerarpaa.
