Kommuneqarfik Sermersooq: Naalakkersuisup oqarnera ilumuunngilaq

Isumaginninnermut naalakkersuisoq kommunit pillugit Qanoruumit apersorneqarluni ima oqarpoq. 

- Soorunami misissuiuaannarpugut kommunini qassini qanoq taakkua 50 procentimik 100 procentimilluunniit annertusisamik tunniussisarnersut. Taannaluunniit atorneqanngitsoq, isumaqarpunga ajornartorsiutinik ujarlerfiusoq suna aporfissaanersumik ujarlertoqarpoq, naak ullumikkut periarfissaasoq suli atornagu, Martha Abelsen oqarpoq.

AAMMA ATUARUK Angajoqqaarsiassaaleqisoqangaatsiarpoq

Tamannali Kommuneqarfik Sermersuumi meeqqanut ilaqutariinnullu ataatsimiitsitaliami siulittaaasumit illuatungilerneqarpoq. 

- Taanna oqaatigisaa ilumuunngilaq. Isumaqarpunga maani Kommuneqarfik Sermersuumi atorparput, tassa 10-15 procent akornanni atorsimavarput, ukioq kingulleq 25-riarluta taanna inatsit malillugu atorsimavarput, Uju Petersen oqarpoq.

Meeqqamut ataatsimut angajoqqaarsiaagaanni nerisassarsiniutissat atisassarsiniutissalluunniit ilanngunnagit qaammammut 5.028 koruuninik aningaasarsisoqartarpoq. Taakkulu ikippallaarsorineqarput.

- Aningaasat eqqartorneqartut saniatigut aamma isumaqarpunga taanna eqqartugassaqqissuusoq, naammanngitsoq immaqa taama oqarluaannarutta, arlaatigut tassa oqarnittuut allannguisoqartariaqartoq inatsimmik, Uju Petersen oqarpoq.

Namminersorlutik Oqartussat nalunaarutaat 2017-imi akuerineqarmat siunnersuutigineqaraluarpoq aningaasarsiat qaamammut 8000 koruuninngortinneqassasut. Tamannali inatsisartunit akuerineqanngilaq. Akissarsialli qaammaammut 1000 koruuninik ilaneqarput 5.028 koruuninngorlutik.

AAMMA ATUARUK Inunnik ujaasinerit marluk aallarteruttorput