Naalakkersuisup ilassinninnermut aningaasartutinik atuivallaarneranut atorfilittat isummersorput

Ineqarnermut avatangiisinullu pisortaqarfimmi pisortaq Dorthe Johansen akiliutinut takussutissanik nammineq atsiorsimasaanik misissueqatigaarput.

Wonder Barimi akiliut, tassa Københavnimi atisaajarluni isiginnaartitsisarfimmiit:

- Aap, isumaqarpunga naalakkersuisoq nammineq oqaloqatigisariaqarit, uanga tamakku pillugit isummersussannginnama, Dorthe Johansen, Ineqarnermut Avatangiisinullu pisortaqarfimmi pisortaq oqarpoq. Aperineqaramilu atsiulinnginnermini tamakku tupigutsaatigineq ajornerai, naaggaarpoq oqarluni namminneq taamaallaat akiligassanut maleruagassaq malinneqarsimanersoq isumagisussaallugu.

Tamatuma kingorna inatsisartut allattoqarfiannut, ilassinninnermut aningaasartuutinut akisussaasuusunut akiligassat ingerlateqqittarnerarlugit.

Namminersornerullutik Oqartussani pisortaaneq Kaj Kleist oqarpoq, naalakkersuisut ataasiakkaat ilassinninnermut aningaasartuutigisimasaat oqaaseqarfigisinnaanngikkallarlugit, ataasiakkaarlugit niaqormiorinnginnamigit.

Kaj Kleistip pissusissamisuunnginnerarpaa, suut tamannguisa, soorlu cigarattit eqqiaanermullu atortut ilassinninnermut kontomit akilerneqartassappata.

Kaj Kleist oqarpoq ilassinninnermut aningaasartuutissanut maleruagassaq sukaterneqassaasoq.

Naalakkersuisut aningaasaliissutinik qaangiinnginnissaat,namminneq tassalu pisortaqarfinni ataasiakkaani pisortatut, minnerunngitsumillu naalakkersuisut akisussaaffigigaat aamma oqaatigaa.

Naalakkersuisut siulittaasuat Hans Enoksen, Jens Napaattuup ilassinninnermut aningaasartuuteqarpallaarsimanera pillugu manna tikillugu oqaaseqarumanngitsoq ullumi oqaaseqarpoq.

Atuivallaarsimanerup kingunissaa pillugu isummertigani, atuivallaarsimanermut takussutissat misissoqqaarniarini tamatumalu kingorna Jens Napaattooq oqaloqatiginiarini naalakkersuisut siulittaasuat oqarpoq.