Naalakkersuisup Amerikamit aningaasaliineq illersoraa: - Ikummarissaasoqartoq

Amerikamiup aningaasaatilissuup Trumpimut attavillip, kalaallit suliffeqarfiutaannut marlunnut aningaasaliineraa Naaja H. Nathanielsenip (IA) ernumanartoqartinngilaa.

Allattoq Ann-Sophie Greve Møller

decembarip 06-at 2025 10:00

Nutserisoq Medea Olsen

Inuussutissarsiornermut Naalakkersuisoq Naaja H. Nathanielsen (IA) aperigaanni, Amerikamiup aningaasaatilissuup kalaallit suliffeqarfiutaannik marlunnik piginneqataalernera ernumalersitsinngilaq.

- Akeqqatut isiginnittaaseqalersitsiniarluni ikummarissaaneruvoq, isumaqarpungalu tamanna tunngavissaqanngitsoq, taanna oqarpoq.

Niuertup Amerikameersup Ronald Lauderip suliffeqarfinni Greenland Water Bankimi aamma Greenland Investment Groupimi piginneqataassutsinik pisisimanera suliami qitiupput. Tamanna Politikenimi sapaatiummat allaaserineqarpoq.

Politikenip allaaserisaa naapertorlugu Ronald Lauder aningaasaatilissuaannaanngilaq. Lauder Kalaallit Nunaannik 'pisiarinninnissamik' Donald Trumpimut isumassarsisitsisutut oqaatigineqartarpoq.

Taamaattumik Danmarkimi nunat tamalaat pillugit ilisimatusarfimmi Forsvarsakademimilu immikkut ilisimasallit Politikenimut oqarput naalakkersuisut politikikkut siunertanut isertortunut mianersortariaqartut.

Kaammattuulli Naaja H. Nathanielsenimit iluarineqanngilluinnarpoq.

- Amerikamiut aningaasaliisartut imermut sikumullu tunngasunut aningaasaliinerat ajornartorsiutaanngilaq. Aningaasaqarnerput ammasuuvoq. Malittarisassatsinnut malinnikkaanni aningaasaliisoqarsinnaavoq. Aningaasaliinikkut politikikkut tassanngaannartumik sunniuteqalersinnaasoqarneranik isikkoqartitsiniarsarisoqarnera piviusorsiorpalaanngilaq, naalakkersuisoq KNR-imut oqarpoq.

- Politikeritut soorunami mianersortuunissaq pisariaqarpoq suut tamarmillu ajunngitsutut isiginaveersaagassaallutik. Silaqassuseqarnissaq naliliisinnaassuseqarnissarlu pisariaqarput, isumaqarpungalu naalakkersuisut taama piginnaassuseqartut, nangillugu oqaatigaa.

Isumaliutaannaasoq

Naaja Nathanielsen, aningaasaliisutut eqqartorneqartup Trumpip Kalaallit Nunaannik tiguaaniarneranut sunniuteqarsimanera ajornartorsiutaava?

- Naamik. Isumaqarpunga tamanna isumaliutaannaasoq. Amerikamiut Kalaallit Nunaannik soqutiginninnerat qularutissaanngilaq. Ukiuni qulikkuutaani arlalinni soqutiginnipput, danskit tamanna aatsaat maanna paasilersimassappassuk taava malinnaanngilluinnarsimapput, taanna akivoq nangillunilu:

- Danmarkimit Kalaallit Nunaannut ukiuni qulikkuutaani arlalinni aningaasaliisoqarpallaarsimanngilaq. Kalaallit Nunaata innuttaasuisa iluaqutigisassaannik inuiaqatigiit ineriartortittariaqarpagut. Aningaasaliisut malittarisassanik malinnippata ajunngilaq.

Politikenip allaaserisaa - sammisaq naatsunngorlugu

Politikenip allaaserisaq ima qulequtsigaq: ‘Trumpip tapersersortaa aningaasaatilissuaq kalaallit suliffeqarfiutaannik piginneqataalersoq’ novembarip 30-ani saqqummiuppaa.
Amerikamiut aningaasaliisartut ’Greenland Development Partners LLC’-imik taaguutillit kalaallit ingerlatseqatigiiffiini marlunni: Greenland Water Bankimi aamma Greenland Investment Groupimi, tamarmik Svend Hardenbergimit Jørgen Wæver Johansenimillu pigineqartuni piginneqataassutsinik pisisimanerat tassani allaaserineqarpoq.
Amerikamiut aningaasaliisartut ilaat tassaavoq Ronald Lauder, USA-p præsidentianut Donald Trumpimut qanimut attaveqartoq. Lauder Kalaallit Nunaannik pisiarinninniarnerup isumassarsiatsialaaneranik Trumpimut qularunnaarsitsisutut Politikenimit erseqqissarneqarpoq.
Svend Hardenbergip Jørgen Wæver Johansenillu politikkimik inuussutissarsiornermillu tunuliaqutaat allaaserisami aamma allaaserineqarput, kiisalu Jørgen Wæver Johansenip naalakkersuisumut Vivian Motzfeldtimut (S) uiunera.
Immikkut ilisimasallit arlallit sammisaq pillugu Politikenimut oqaaseqarsimapput, aningaasaliineq mianersorfigisariaqartutut isumaqarfigalugu ‘Kalaallit Nunaata aqunneqalernissaanik politikkikkut siunertaqartoqarsinnaammat’.

Allisiguk

Greenland Water Bankimi pisortaasut ilaat Jørgen Wæver Johansen, Nuummi Siumumi siulittaasuunera nunanullu allanut tunngasunut naalakkersuisup Vivian Motzfeldtimut katisimasuunera, Naaja H. Nathanielsenip ajornartussaqartinngilaa.

Politikenimi tamanna erseqqissarneqarpoq.

- Uanga atuisinnaatitsinernik akuersissutinillu tunniussisartuuvunga ulluinnarnilu attaveqarfiginnittuullunga. Taasuma (Vivian Motzfeldtip aaqq.) aalajangiinerit akuliuffigineq ajorpai sunniuteqarfigisinnaanagillu, Naaja H. Nathanielsen oqarpoq.

Danskit ajornanngitsitsiniaasut

Amerikamiut aningaasaleeqataasartui qanoq nakkutigitigissavagut?

- Aningaasaliisut USA-meersuunerat piinnarlugu inunnik ajortunngortitsiniaavissortutut pissuseqarneq peqataaffiginianngilluinnarpara. Tamanna danskinit ajornanngitsitsiniaaneruvoq, immaqalu danskit soqutigisaannik aallaavilimmik annerusumik kiffartuussiniarnerulluni. Kalaallit Nunaanni innuttaasunut iluaqutaasussamik Kalaallit Nunaanni inuiaqatigiit ineriartortinnissaat naalakkersuisutut sulininni qulakkiigassaraara, taanna oqarpoq.

Una paasineqartariaqarpoq, Naaja H. Nathanielsen nangilluni oqarpoq, inatsisitigut aaqqissuussineq pissutaalluni, aningaasaliinikkut politikikkut sunniuteqartoqarsinnaanngimmat.

Nunanit allanit aningaasaliinerit ilaasa misissorneqarnissaat pillugit inatsit nutaaq Inatsisartuni suliarineqartoq, aammattaaq erseqqissaatigaa. Nunanit allanit aningaasaliissutit misissorneqarsinnaanissaat, naalakkersuisullu inatsit naapertorlugu periarfissaqalissallutik taakku aningaasaliinissaannut itigartitsisinnaassallutik aningaasaliissutaannilluunniit utertitsisinnaanngussallutik.

Nunanit allanit aningaasaliinerit ilaasa misissorneqarnissaat pillugit Inatsisartut inatsisissaattut siunnersuut Inatsisartut upernaakkut ataatsimiinneranni februaarimi inaarutaasumik suliarissavaat.

- Inatsisit kalaallit suliffeqarfiinut iluaqutaasussat inuussutissarsiornermullu illersuisussat suliarisimavagut, tamatumalu saniatigut nunanit allanit aningaasaliissuteqarnissamut periarfissanik ammaassiniarluta ilungersorsimavugut. Tassanilu ilaapput aningaasaliisartut Amerikameersut, Naaja H. Nathanielsen oqarpoq.

- Kalaallit Nunaat tiguarumallugu kissaateqartoqarpat tamanna attaveqatigiinnermut soorunalimi sunniuteqassaaq. Aammali Amerikamiumit aningaasaliisoqarnera USA-p Kalaallit Nunaannik tiguaaneranik isumaqanngitsoq aamma eqqaamasariaqarparput, taanna naggasiivoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.