Naalakkersuisunut illuatungiliuttut qinersinissaq piumasaraat

Naalakkersuisunut illuatungiliuttuni partiini siuttut isumaqarput aalisarnermut naalakkersuisuusimasup Rasmus Frederiksen-ip tunuarnera pissusissamisoortuusoq. Qinersisoqartariaqarporli nunatta tatigineqarnini annaassanngippagu, partiit Atassutip siulittaasua Augusta Salling kiisalu Demokraatineersoq Per Skaaning taama isumaqarput. Augusta Salling ima oqarpoq:

- Pissusissamisoorsoraara aalisarnermut naalakkersuisup Rasmus Frederiksenip tunuarniuteqarnera, tamannali naammanngilaq. Naalakkersuisut tulleriiarlutik eqqunngitsumik iliornertik tunngavigalugu tunuartarnerat qinikkat qinersisartuninngaanniit aammalu nunatta avataaninngaanniit tatigineqarnerat aaqqinneqaqqissappat naalakkersuisut siulittaasuat Hans Enoksen aamma akisussaaqataangaartoq, piaarnerpaamik qinersinissamik nalunaaruteqartariaqartoq, Augusta Salling oqarpoq. Demokraatit sinnerlugit inatsisartuni ilaasortap Per Skaaning-ip naalakkersuisut aamma naammagilernerarpai qinerseqqusillunilu.

- Pissusissamisuuginnarpoq kukkunersuisartut Deloittekkut naqissusermassuk atornerluisoqarsimanera. Taamaattumik Rasmus Frederiksenip tunuarnera pissusissamisoorpoq, Per Skaaning oqarpoq. Naalakkersuisut tatiginassusiat assut innarlerneqartoq Skaaning erseqqissaavoq.

Danmarkimi Folketingimi qinikkat arlallit nunatsinnut ukiumoortumik aningaasaiissutaasartunik aqutsinerup sukateriffigineqarnissaannik isummersulernerat Per Skaaning-ip paasinerarpaa akuersaarnaguli.

- Isumaqarpunga nunatsinni ingerlatassagut nammineq ingerlattariaqarigut, takutittariaqarparput ajornartorsiutigut nammineq aaqqissinnaangigut. Taamaattorli naalakkersuinikkut pisut kingullit takutippaat naalakkersuisut namminneerlutik aaqqiisinnaanngitsut, taamaattumillu qinersinissamut immaqa piffissanngorpoq, Per Skaaning oqarpoq.

Kattusseqatigiit siulittaasuat Anthon Frederiksen aamma Inuit Ataqatigiit siulittaasuat Josef Motzfeldt attaveqarfiginiaraluaratsigit iluatsinngitsoorparput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat