Naalakkersuisunut atugassiissutit amerlaqaat
Ineqarnermut Naalakkersuisup Jens Napaattuup najukkaminut Nuummi akisoorsuarnik illuutillit akornanniittumut 200 kvadratmeterinik angitigisumut qaammammut 3.000 koruunit inorlugit akilimmut akiliiumasimannginnera sapaatip-akunnerani kingullermi ilanngutassiaraarput. Aviisit sapaatip-akunnerani matumani allaaseraat, Namminersornerullutik Oqartussanit erseqqissaatigineqarsimasoq, Napaattooq inatsimmik tunngavissaqarluartoq unioqqutsitsisimanngitsorlu.
Naalakkersuisunili ilaasortat qanoq piginnaatitaaffeqarpat, aaqqissuisoqarfitsinnit tamanna paasiniarparput.
Akissarsiat aallartissutigeriartigik, qaammammut 60.000 koruunit missarluinnaaniipput, apeqqutaanani Naalakkersuisuni ilaasortaagaanni Inatsisartuugaanniluunnit – Naalakkersuisut allattoqarfiat taama ilisimatitsivoq.
Naalakkersuisulli Inatsisartullu siulittaasuata akissarsiai amerlanerulaarput. Hans Enoksen aamma Jonathan Motzfeldt tamarmik immikkut qaammammut 72.000 koruuninik akissarsiaqarmata.
Taakku saniatigut tapisiaqartoqartarpoq. Naalakkersuisoq soraarniuteqarpat, soraarpat imaluunnit soraarsitaappat, tunuarneranut aningaasanik tunineqartarpoq – assersuutigalugu ukioq ataaseq atasimappat minnerpaamik qaammatip aappaa avillugu akissarsisinneqartarluni. Taamaalilluni assersuutigalugu Hans Enoksen aqagu tunuassagaluarpat 150.000 koruuninik tunineqassagaluarpoq, imaluunnit naalakkersuisut siulittaasuattut decemberimi ukiut pingasunngorunigit 220.000 koruuninik tunineqassagaluarluni.
Naalakkersuisut tunuaraangata angerlamut akiliunneqartarput, pequtaasalu angallanneqarnerat Namminersornerullutik Oqartussanit akilerneqartarluni. Naalakkersuisut aapparisaat Nuummut nooqataassanngikkaangata aapparisaq meeqqallu 18-it inorlugit ukiullit ukiumut marloriarlutik akiliutsillutik tikeraarsinnaasarput.
Naalakkersuisoq Nuummi utaqqiisaasumik ineqartinneqarsimappat pequtaasa tikinnissaasa tungaannut akeqanngitsumik ineqartinneqarsinnaasarpoq, soorlu Jens Napaattooq naalakkersuisut illuutaanni akeqanngitsumik najugaqarsinnaatitaasimasoq.
Namminersornerullutik Oqartussat illunik A/S INI-mit attartornerminni qaammammut 6.000 koruunit 9.000 koruunillu akornanni akiliuteqartarput, naalakkersuisunili ilaasortat 2-3.000 koruunit missaanni akiliisarput, akiliutissap sinnera akileraartartunit akilerneqartarluni.
Naalakkersuisunut atugassiissutigineqartut annersaasa ilagaat angalaneq qaaqqusisinnaatitaanerlu.
Naalakkersuisut allattoqarfiat naapertorlugu qaaqqusinerminnut atugassiissutit killeqartinneqanngillat, taamatuttaaq suut pisortatigoortumik qaaqqusinerunersut erseqqissumik maleruagassaqartinneqanngilaq. Allatut oqaatigalugu, naalakkersuisoq assersuutigalugu inunnik 20-nik neriniartarfimmut sumulluunnit qaaqqusisinnaatitaanerannik killeqartitsisoqanngitsoq. Kukkunersiuisut oqaaseqarsinnaatitaapput, kingornagulli politikkikkut aalajangigassaasoq, Naalakkersuisunut allattoqarfik erseqqissaavoq. Aamma taamaappoq angalanernut tunngatillugu.
Naalakkersuisoq angalassagaangami akisunermi angasarpoq, hotelinilu pitsaasuni najugaqartarluni. Taamaattorli ullormusiaqartinneqarneq ajorpoq, akiligassallu namminneq akilertarpai.
