Naalakkersuisunut akerliulluni naaggaarnissaq aarleqqutigaa
- Naalakkersuisut atorsinnaannginnerat pillugu inuiaqatigiit kamaataat paasisinnaalluarpara. Naalakkersuisulli peqqutigiinnarlugit Namminersorneq pillugu inatsimmut naameerluni taasinnginnissap erseqqissarnissaa pingaaruteqarpoq, Juliane Henningsen taama Atuagagdliutini ullumi saqqummersumi issuarneqarpoq.
Taassuma assersuutitut aningaasanut inatsit maangaannartoq tikkuarpaa oqarluni Naalakkersuisut namminneq aningaasaqarnermut siunnerfitsik paatsiveerummassuk naalakkersuisunut ilaasortaq akerliulluni tunuartoq.
Juliane Henningsen aamma isumaqarpoq Hans Enoksenip kalaalinngorsaanermi politikkia nunamut iluaqutaanngitsumik inuiaqatigiissutsimik pingaartitsivallaartutut nipeqartoq.
Juliane Henningsenili isumaqarluinnarpoq Namminersornermut naaggaarneq kukkunerussasoq.
- Naalakkersuisut qaqugorsuarmut atasussaanngillat, namminersornerli pillugu inatsit sivisuumik atuuttussaavoq, Kalaallillu Nunaata namminersulivinnissaanut alloriarnertut pingaarutilittut inissisimavoq, Juliane Henningsen Atuagagdliutinut taama oqarpoq.
