Naalakkersuisunut akerlilersuisoq nersornaaserneqassaaq

- EU-Parlamentip taamatut nersornaasiinermigut Kinami inuit pisinnaatitaaffiinik sorsuuteqartunik tapersersuinini ersersinniarsaraa, Hans-Gert Pöttering EU-Parlamentip siulittaasua oqarpoq.

Kinamiu 36-nik ukiulik nersornaaserneqartoq, inuit pisinnaatitaaffiinik avatangiisillu innarlitsaaliorneqarnissaannik sorsuutiginnittuusoq, ukiut sisamaata affaani, naalagaaffimmut akerlilersuisutut parnaarusimaneqartussanngortitaanini pissutigalugu maanna parnaarusimaneqarpoq. Aamma ukiormanna Nobelip Eqqissinermut nersornaasiuttagaanik nersornaaserneqartussatut innersuunniarneqaraluarpoq. Taamali pisoqarmat Kinap nunanut allanut ministeeriaqarfiata pinerluttutut nalunaarutigaa.

Kinap EU-mi aallartitaata Song Zhe-p, Hu Jia nersornaaserneqassappat tamanna Kinap EU-llu akornanni ajoquseerujussuartussaasoq Pöttering-imut mianersoqqussutigereerpaa. Nersornaat pineqartoq ukiormanna 20-ssaa tunniunneqarpoq, atserneqarsimallunilu Sovjetunioniusimasumut isornartorsiuisartoq russeq toqoreersoq Andrej Sakharov atsiullugu.