Naalakkersuisunngortut ilisaritinneqartut

Ministeriunerup Anders Fogh Rasmussenip naalakkersuisunngortut Dronningimut ullumi ilisaritikkiartorpai, kingorna oqaluttuarai kikkut naalakkersuisunngornersut.

Naalakkersuisunngortut misilittagaqarneq, inuusunneq, allanngujuinneq, nutarsaanerlu ilisarnaatigaat, Anders Fogh Rasmussen qungujulaqaluni oqarpoq. Ministereqarfiit pingasunik ilapput; Silap Pissusaanut Nukissiuuteqarnermullu ministereqarfik, Connie Hedegårdimit, ullumimut Avatangiisinut ministeriusumit ingerlanneqassaaq, Atugarissaarneq pillugu ministereqarfik ulloq manna tikillugu Inunnik Isumagininnermut ministeriusumit, Karen Jespersenimit akisussaaffigineqassaaq, kiisalu Peqqinnissamut ministereqarfik immikkut ministereqarfinngoqqissaaq, ulloq mannalu tikillugu Angallannermut ministeriusumit, Jakob Axel Nielsen-imit ingerlanneqalissaaq.

Ministerinngortut tupaallaatigineqarnersaat tassaavoq, Birthe Rønn Hornbech, Venstreneersoq, Nunasisunut ministerinngortoq. Birthe Rønn Hornbechilli Dansk Folkepartiinik suleqateqalernissani qanoq isumaqarfiginerlugu ullumi oqaatigerusuppallaanngilaa, nalunanngilarli Danmarkimi nunasiniartut qanoq pineqartarnissaat isumaqatigiinngissutaassaqisoq. – Suliassaq imminut unammillernaqisoq tiguara, Birthe Rønn Hornbech oqarpoq.