Nunatsinni partiit angisuut pingasut Siumut Atassut Inuit Ataqatigiillu namminersornerulersimanitsinnit ukiut 26-it ingerlaneranni illuatungeriittarsimaqisut naalakkersuisooqatigiilerput. Naalakkersuisooqatigiinnissami meeqqat atugaat salliutinneqarput.
2009 tikillugu Siumut Atassut Inuit Ataqatigiillu
Naalakkersuisooqatigiittussanngornertik ullumi atsioqatigiissutigaat, naalakkersuisuutitassatillu aamma saqqummiullugit.
Naalakkersuisunngortitsinermi Siumut sisamanik IA Atassullu tamarmik immikkut marlunnik naalakkersuisuni ilaasortaqalissapput, naalakkersuisunngortussallu ilaasortaasareersoqarlutillu nutaartaqarput.
Siumut siulittaasua Hans Enoksen naalakkersuisut siulittaasuattut ingerlaqqissaaq.
Kulturimut Ilinniartitaanermut Ilageeqarnermut Ilisimatusarnermullu Naalakkersuisunngorpoq 28-inik ukiulik Siumumeersoq Doris Jakobsen.
Inatsisartunut qinigaarngaartoq Siumumeersoq Aleqa Hammond Ilaqutariinnermut Inatsiseqarnermullu Naalakkersuisunngussaaq. Siumumeersoq Jørgen Wæver Johansen, naalakkersuisunngoqqippoq, tamatumuuna Ineqarnermut Attaveqarnermut Aatsitassanullu naalakkersuisunngorluni. Jørgen Wæver Johansen Siumumi ataatsimeersuarnerup kingorna Namminersornermut naalakkersuiuunerminit tunuarnikuuvoq.
Inuit Ataqatigiit siulittaasuat Josef Motzfeldt Aningaasaqarnermut Nunanullu allanut tunngasunut
Naalakkersuisutut ingerlannassaaq IA-meersorlu alla Asii Chemnitz Narup Peqqissutsimut naalakersuisunngoqqilluni, tamatuma saniatigut Avatangiisinut aamma Naalakersuisunngorpoq.
Atassutip siulittaasua Finn Karlsen
Aalisarnermut Piniarnermullu Naalakkersuisunngorpoq, kiisalu Atassummeersoq Maniitsumi borgmesteriusarsimasoq Inatsisartunut aamma qinigaasoq Siverth K. Heilmann Inuussutissarsiornermut Nunalerinermut Suliffeqarnermullu Naalakkersuisunngorpoq.
IA-ip Siumullu naalakkersuisooqatigiinnerannut avissaarutaavoq Siumut angunigaa meeqqanut checki. Meeqqanut checki tamatumuuna piviusunngortinneqassasoq
Naalakkersuisunngortussat siulittaasuat Hans Enoksen
oqarpoq:
- Isumaqatigiissutigaarput 2007-imi aallartissasoq. Taama ukiuliinitsinnut pissutaavoq inatsisitassaa naammasineqaqqaartariaqarmat. Inatsisitassaa aatsaat naammassineqarpat aningaasartalerneqarsinnaammat.
Meeqqanut checki qineqqusaarnermi naalakkersuisunngortitsiniarnermilu Siumut aalajangiusimalluinnarsimagaa Hans Enoksen oqarpoq.
- Paartiit tamarmik akueraat.
Inatsisartut ataatsimeereerpata suliassat siullitassat pingaarnerit tassaapput:
- Meeqqanut tunngasut piaarnerpaamik allartinneqassapput. Erninermi atatillugu sulinngiffeqartarnermik sivitsuinissaq meeqallu angajoqqaaminnit sumiginnarneqarsimasut annertuumik ikiorsiiffigineqarnissaat qinersisartut kissaatigaat piaartumik aamma suliarinarparput.
- Angallannermut tunngasut aaqqiiniarnissallu aamma aallartinniarneqassapput.
Taakku tamarmik aningaasanik naleqarput aallerfissaqartorlu Enoksen oqarpoq.
- Aningaasat 5,5 mia. Koruunit inuiaqatigiinni ukiumut kaaviiartinneqartarput, taakkunannga meeqqanut tunngasut aningaasalerneqassapput, allatullu ajornarrtumik ilai pilliuteqarfigigineqartariaqassapput. Taanna naalakkerusisooqatigiilersussat piumassuseqarfigaat.
Aningaasat sumerpiamiit aaneqarnissaat hans Enoksen-ipå erseqqissumik oqaatiginngilaa, tamaattorli oqarpoq aallarfigineqartussat sapinngisamik annikitsumik aallarfigineqarnissaat siunertaasoq.
Angallannermut tunngatillugu naalakkersuisunngortut piaartumik suliassaminnut ilaatippaat isorliunerusuni soorlu Upernavimmi nunaqarfiit imaatigut angallannermut ilaatinneqarnissaata qulakkeerneqarnissaa.