Naalakkersuisunngortussat arnartaqarluassapput

Marlunngormat kingullermik qinersinermi ajugaarujussuareerluni, tusagassiortunik nalunaaqutaq qulinut katersortitsiguni, politikerit nuimasut nutaat Kuupik Kleistip ilisaritissavai.

Inuit Ataqatigiit, Demokraatit aamma Kattusseqatigiit Partiiat naalakkersuisoqatigiilissasasut paasinarsereerpoq . Inuit Ataqatigiit 14-inik isertitaqaraluarlutik Kattusseqatigiit Partiiat ataasiinnarmik isertitaqartoq taamaalillutik suleqatigilissavaat.

Kisiannili paasinarsereerpoq, Demokraatit oqimaatsunik marlunnik naalakkersuisuuffeqalissasut. Siulittaasoq Jens B. Frederiksen Ineqarnermut Attaveqaqatigiinnermullu naalakkersuisunngussaaq, Palle Christiansenilu Aningaasaqarnermut naalakkersuisunngussalluni.

Naalakkersuisoqarfiit allat kikkunnut tunniunneqassanersut suli paasinarsinngilaq. Kisianni Naatsorsuutigineqarpoq Peqqinnissamut Ilaqutariinnermullu naalakkersuisoqarfik, naalakkersuisoqarfinnut marlunnut immikkoortinneqassasoq. IA-milu arnat qinigaalluartut ilaasa taakku naalakkersuisuuffigilissagaat. Assersuutigalugu, Naaja Nathanielsen qinigaanerpaarlu Maliina Abelsen Meeqqat inuusuttullu pillugit ilisimasaqarfimmi, MIPI-mi, tamarmik sulisimapput.

Naalakkersuisunngortussani arnat angutillu amerlaqatigiinnissaat aamma ilimagineqarpoq. Aamma inuussutissarsiornermut tunngasut kimit naalakkersuisuuffigineqalissanersut pissanngatigineqarpoq. Taassumami Alcoa pillugit pilersaarutit isumagisussaassammagit.