Naalakkersuisunngortussat aqqi suli tusarliunneqanngillat

Partiit Siumut, Atassut aamma Inuit Ataqatigiit siulittaasuisa kikkut naalakkersuisoqarfinnut inuttaliutissanerlugit oqaaseqarfigiumanngikkallarpaat.

Naalakkersuisooqatigiilersussat partiiminni inuit kikkut naalakkersuisoqarfinni naalakkersuisunngortinniarnerlugit oqaaseqarfigiumanngivippaat. Siulittaasut tamarmik partiiminni tunuliaquttatik ullumi ataatsimeeqatigereernissaat innersuussutigaat.

Atassutikkut Siumukkulllu partiiminni naalakkersuisunngortikkumasatik aalajangissallugu inatsisartunut qinigaasut kiisalu partiimi siulersuisuunerit nalunaaqutaq qulinut ataatsimeeqatigaat. Aamma Inuit Ataqatigiit siulersuisuuneri qinigaasullu nalunaaqutaq aqqanermut naapipput.

Inuit Ataqatigiit siulittasuat Josef Motzfeldt oqarpoq, Naalakkersuisut Siulittaasuata piumaguni aatsaat decemberip aallaqqaataani inatsisartunngortut ataatsimiilerpata kikkut naalakkersuisunngorumaarnersut nalunaarutigisinnaagai.

Ilisimariikkatsitut Inuit Ataqatigiit Aningaasaqarnermut kiisalu Peqqinnissaqarfimmut Naalakkersuisoqarfiit inuttalertussanngorpaat, taakkulu inuit tassaasinnapput Josef Motzfeldt aamma Asii Chemnitz Narup.

Atassutikkut Aalisarnermut Inuussutissarsiornermullu naalakkersuisoqarfiit inuttalerniartussaavaat.

- Kikkut naalakkersuisunngortinniarnerlugit aatsaat ullumi ataatsimiinnermi aalajangerneqassaaq, Atassutip siulittaasua Finn Karlsen qulinngoriartortoq oqarpoq.

Qularnanngitsoq tassaavoq Hans Enoksenip naalakkersuisut siulittaasuattut ingerlaannartussanngornera. Siumukkut naalakkersuisoqarfiit inuttalerniagassaat tassaapput Kulturimut – Ilageeqarnermut Ilinniartitaanermullu Naalakkersuisoqarfik, Ineqarnermut – Attaveqarnermullu Naalakkersuisoqarfik kiisalu Ilaqutariinermut Naalakkersuisoqarfik.

Eqqoriarneqarsinnaavoq Ilaqutariinnnermut Naalakkersuisoqarfimmi Tommy Marø-p ingerlaannarsinnaanera. Aamma Doris Jakobsen-ip Kulturimut, Ilageeqarnermut Ilinniartitaanermullu inissinneqarsinnaanera ilimanarsinnaalluarpoq kiisalu Per Rosing-Petersen-ip Ineqarnermut Attaveqarnermullu Naalakkersuisoqarfimmut inissinneqarsinnaanera ilimanarsinnaalluni. Kisiannili tassa aatsaat partiit tunuliaqutttaminnik ataatsimeqateqareerneranni kikkut naalakkersuisoqarfinnut ingikkumaarnissaat paasinarsissaaq.

Partiit pingasut naalakkersuisunngoqatigiinnerminni isumaqatigiissutaat aqagu tallimanngornermi atsiorneqarnissaa ilimagineqarpoq.