Naalakkersuisunngortussanik ilisarititsinissamut aqagunnera ulapaarfiuvoq

Suut inissitsitigassat amigaatigineqarsimanersut paasissutissiissutigineqanngilaq, Inatsisartoqarfiulli torsuusai ualinerani ulapaarfiupput, Atassutillu siulittaasuata naalakkersuisooqatigiinnullu ilaasortap naalakkersuisunngortussat ilisaritinneqassanersut aamma nalornissutigivaa. Nikku Olsenip ualip annersaani Aleqa Hammond allaffiani ataatsimeeqatigaa kingornalu Partii Inuit Siumullu ataatsimeeqatigiillutik. Atassut ataatsimiinnermut tassunga peqataatinneqanngilaq. Gerhardt Petersen Atassummeersoq naapertorlugu naalakkersuisooqatigiit tunngavissaat piareeqqavoq, taamaammat tamatuma oqallisigineqarnera ilimanarpallaarani.

Gerhardt P: Aajuna, allaqqissaareerlugu piareeqqavoq.

KNR: Aap, Naalakkersuisooqatigiinnermi tunngavissat takutitattut piareeqqapput, soormiuna ataatsimeeqattaaginnavippisi susoqarneranillu oqaaseqarumanasi?

Gerhardt P: Oqaatigeriikkattut uagut suliassarput naammassereerpoq isumaqatigiinniarnermilu siuttup tusagassiortunik katersortitsinissamut aggersaanissaa naatsorsuutigaara.

KNR: Qinigaanerup Misilinneqarnissaanut Ataatsimiititaliap sulianik arlalinnik suliaqarnera paasivarput. Naalakkersuisunngortussat ilaata qinigaasinnaannginnerat pissutigalugu sivitsortoorutigineqarpa?

Gerhardt P.: Tamanna ilisimasaqarfiginngilara aamma oqaaseqarfigissanngilara. Aamma ilisimasaqarfigigaluarukkuluunniit oqaaseqarfiginavianngilara.

Partii Inuit siulittaasuat Nikku Olsen eqqissisaalluni naalakkersuisooqatigiinni nutaani isumaqatigiinngittoqannginneranik oqarpoq.

- Immikkoorluta arlaleriarluta ataatsimiittarpugut, imaanngilaq partiit akornanni avissaartuuttoqartoq. Kisianni ataatsimiinnerit ingerlalluarput, Nikku Olsen oqarpoq.

Qinigaanerup Misilinneqarnissaanut Ataatsimiititaliami susoqarnera aamma taassuma oqaaseqarfigiumanngilaa.