Naalakkersuisunngortup suleqatigilluarnissaa neriuutigaat

Simon Olsenip Aalisarnermut Piniarnermullu Naalakkersuisutut ippassaq tunuarnera politikkikkut oqaaseqarfiginagu aalajangernerali ataqqillugu kiisalu naalakkersuisunngortumut Rasmus Frederiksenimut isumalluarlutik aalisartut piniartullu kattuffianni KNAPK siulittaasoq Leif Fontaine oqarpoq:

– Aak nutaaq inuusuttoq pisariaqartinneqarsimavoq, taamaattumik neriuppugut ullut nutaat alloriarfigiumaarlugit. Aalisarnerup nutarterneqarnissaanut, aalisarnikkut piniartunullu ilinniartitaanerit qaffassarneqarnissaannut, aalisartunut piniartunullu ilinniarfiup aallartisarneqarnissaannut kiisalu aalisariutit nutarterneqarnissaannut suliniutit sukkanerusumik alloriarfigineqarumaartut neriuutigaarput. Leif Fontaine nassuiaavoq.

Kattuffiup siulittaasua aamma erseqqissaavoq, naalakkersuisunngortoq Rasmus Frederiksen Sisimiuni aalisarnermut piniarnermullu siunnersortaammat assigiinngitsutigut attuumassuteqarfigisarlugu, taamaattumillu ilisarisimalluarlugu oqarsinnaalluni.

Simon Olsen soqutigisaqaqatigiiffinnit sunnerneqarsimanerarlugu isornartorsiuisut oqariartuuteqartarsimapput, tamanna pillugu Leif Fontaine oqarpoq, namminneq soqutigisatik pineqaraangata pisarnermittut oqalliseqataasarnissartik aamma naatsorsuutigalugu.

Aamma Aalisariutinik Piginneqatigiit Kattuffiat suleqatiginilluarnissamik neriuuteqarput.

- Kattuffiit tamarmik soqutigisaraat naalakkersuisunik suleqateqarluarnissartik, taamaattumik naalakkersuisunngortoq suleqatigilluassallugu aamma neriuutigaarput. APK-mi pisortaq Peder Munk Pedersen erseqqissaavoq.

Taamaattumik suleqatigiilluni inerititsilluarnissaq sapinngisamillu isertitaqarfiulluartumik suleqatigiinnissaq neriuutiginerarpaa.

Simon Olsenip kattuffinnit sunnerniarneqartarsimanerannik isornartorsiuinerit pillugit Peder Munk Pedersen aamma oqarpoq, namminneq kimigiiserneq atugarinagu, soqutigisatillu tutsuiginartumik kusanartumillu saqqummiuttaritik.

Royal Greenlandip naalakkersuisunngortoq Rasmus Frederiksen aamma neriulluarfigaat.

- Tikilluaqquarput, neriuutigaarpullu aalisarnermik soqutigisalinnut tusaaniarluartassasoq. Royal Greenlandimi pisortaq Henrik Leth oqarpoq.