Aalisarnermut piniarnermullu naalakkersuisutut Simon Olsenip tunuarnera pissusissamisoortoq, Naalakkersuisunut illuatungiliuttut Atassut isumaqarpoq. Rasmus Frederiksenillu naalakkersuisunngortinneqarnera pillugu Atassutip siulittaasua Augusta Salling ima oqarpoq:
- Uagut taaseqataanngilavut, naalakkersuisunngortinneqartoq politikkikkut akisussaaffimmut taama annertutigisumut ivertissallugu qanoq piginnaaneqartiginersoq kiisalu qanoq misilittagaqartiginersoq nalugatsigu. Augusta Salling tunngavilersuivoq.
Demokraatinit Palle Christiansen oqarpoq, naalakkersuisunngortup Rasmus Frederiksenip taasissutigineqarnerani taaseqataaniarnatik aalajangersimallutik.
- Naalakkersuisunngortoq qanoq piginnaasaqartiginersoq minnerunngitsumilu kattuffinnit soqutigisaqaqatigiiffinnit qanoq sunnerneqartigisinnaanersoq paasinarsissaaq. Palle Christiansen naliliivoq.