Naalakkersuisunngortitsisinnaaneq malittarisassiuunneqarpoq
Qinersisoqartinnagu qinikkat qaqugukkut naalakkersuisunngortitsisinnaanerannut tunngasunik erseqqissumik maleruagassiortoqartussanngorpoq.
Inatsisartut suleqatigiissitaliaat tamanna pillugu siunnersuuteqarpoq, suleqatigiissitap Naalakkersuisut Inatsisartullu pillugit inatsimmik nutarterinissamik pisariaqartitsisoqarnersoq misissugaraa.
Suleqatigiissitap nassuiaataa Inatsisartunit ippassaq suliarineqarpoq, suleqatigiissitallu tikkuagaasa ilagaat, naalakkersuisooqatigiit isasoorpata qinersinissamik suaarutiginninnissamut Naalakkersuisut siulittaasuat qaqugukkut pisinnaatitaaffeqarnersoq maleruagassaatigineqanngimmat.
Aamma Naalakkersuisut siulittaasuata piffissaq qanoq sivisutigisoq atorlugu naalakkersuisunngortitsiniarsinnaanersoq allassimasoqanngilaq, piffissamik killiliisoqarsimanani. Tamannalu pissusissamisuunngitsoq suleqatigiissitaq isumaqarpoq.
Nassuiaat Inatsisartunit ippassaq oqaluuserineqarmat amerlanerussuteqartut allannguinissamik pisariaqartitsisoqarneranik tapersiipput, Demokraatilli tuaviuussilluni allanngortiterisoqarnissaanik mianersoqqusillutik.
Inatsisit nutartikkat Inatsisartut aappaagu ukiakkut isummerfigissavaat.
