Naalakkersuisunngortitsiniarnini nangeqqissavaa
Naalakkersuisunngortitsiniarnermini partiit talerperliunerusut marluk suleqatiserigaluarpai, iluatsinngitsumilli. Partiit qinersineq tikillugu illuatungiliuttuusimasut Republikanerit Centerpartiilu ullumikkut isumaqatigiinniaqatiginiarpai.
Partiit pingasut taakkua ullumikkut isumaqatigiinniartussat innuttaasut atugarissaarnissaat, sulisartoqarnikkut ingerlatsineq, isumaginninnermut ilaqutariinnermullu apeqqutini suleqatigiilluarsinnaassagunaraluarput, tamannali ilungersunarnerulissaaq namminersulernissaq inuunermilu pingaartitanut tunngatillugu apeqqutit sammineqalerpata. Republikanerit Savalimmiut namminersulivinissaat anguniagaraat, Centerpartiip Savalimmiut kristumiuussuseq tunngavigalugu aqunneqarnissaat sorsuutigigaat, assersuutigalugu suiaassuseqatigiillutik atoqatigiittartut pillugit siorna oqallinnermi Republikanerit Centerpartiilu illua’tungeriilluinnarput.
Partiit taakku pingasuullutik Inatsisartuni amerlanerussuseqaqqalaarput tassami ilaasortanit 33-usunit 17-inik inatsisartuni ilaasortaatitaqaramik. Taamaattumik Jóannes Eidesgaardip illua’tungiliuttut partiiat alla Selvstyrepartiet isumaqatigiinninniarnernut aamma qaqquaa.
