Naalakkersuisunngortitsiniarneq iluatsittutut isikkoqalerpoq
Siumup siulittaasua, naalakkersuisunngortitsiniarnermilu siuttuusoq, Aleqa Hammond tusagassiortunik katersortitsinissaminik aalajangiussivoq, taama pissalluni ualeru nalunaaqutaq tallimanut qiteqquppat. Naalakkersuisunngortitsiniarnermi Inuit Ataqatigiit ullaatungaa ataatsimeeqatigineqarput, Parti Inuit ualeq manna ataatsimeeqatigineqartoq. Partii Inuit ataatsimeeqatigineranni paarlersuarniit tusaaneqarsinnaavoq, ataatsimeeqatigiit nuannaapaloqalutik illaqattaartut.
Allattoq Simon Uldum
marsip 19-at 2013 13:51
Partii Inuit siulittaasuat, Nikku Olsen ataatsimiinnerup kingorna oqaasissaqangaagitsoq, Siumup siulittaasua, Aleqa Hammond radioaviisimut oqarpoq imaattunik.
- Partiinik ataatsimeeqateqartareerluta ima tunngavissaqarsoritigilerpugut allaat, Siumup siulersuisuunerinut apuussaqalerluta. Uangut innersuussassagut Siumup siulersuisuunerisa aamma eqqartussavaat, tamannalu pillugu ualimut nalunaaqutaq tallimap qeqqanut tusagassiortunik katersortitsissaagut.
Tusagassiortunik katersortitsineq Qanoruukkut aamma Radiokkut toqqaannartumik aallakaatinneqassaaq.
