Naalakkersuisunngortitsiniarlutik isumaqatigiinniartut toqqamavissatik piareerpaat

Naalakkersuisunngortitsiniarluni isumaqatigiinniartut ualeq naallugu isumaqatigiissutissap toqqammavissaata aningaasartaanut tunngasunut naatsorsuinermut atoreerlugu, maanna naalakkersusunngortitseqatigiinnissaminnut tunngavissatik inaarsaleruttorpaat.

Siumut sinnerlugu isumaqatigiinniaqataasoq Jonathan Motzfeldt oqarpoq, isumaqatigiinniartut imminnut naapikkiartuaartut:

- Isumaqatigiinniarnerit naammassiartorput, tallimanut isumaqatigiissutissamut tunngasvissavut inaarsassavavut, Jontahan Motzfeldt oqarpoq.

Meeqqanut inuusuttullu atugarisaannut

tunngasut, soorlu erninermi sulinngiffeqartarnernut, meeqqat tapii, atuartut atuarfimmi nerisalernissaat, atuartut anginerit tamarmik aningaasarsiaqartalernissaannut tunngasut aammalu meeqqat paarinerlutat atugarisaannut pitsanngorsaatissanut tunngasut, ilaatigut ualimut isumaqatigiiininniutigineqarput.

Jonathan Motzfeldt isumaqarpoq meeqqanut inuusuttullu atugarisaannut tunngasunik isumaqtigiinniarnerit naammaginartumik angusaqarfiusut.

- Uanga isumaga malillugu ajunngitsumik angusaqarfiupput, kisianni aningaasartaannut tunngasut tamakkerlugit naatsorsorsinnaangilagut, taakku naalakkersuisunngortut naatsorsorumaarmatigik, Jonathan Motzfeldt oqarpoq.

Taama oqarpoq Jontahan Motzfeldt.

Inuit Ataqatigiit sinnerlugit isumaqatiginninniaqataasoq Kuupik Kleist oqarpoq isumaqatigiinniarnermi eqqarsarluarnissaq pisariaqarsimasoq naapinniarfissat amerlammata, taamaattorli isumaqarluni partiit pingasut isumaqatigiinniarnerat tamanut peqqinnartuusoq.

Isumaqatigiiniarnermi toqqammavissaq misissoqqissaarneqareerpat partiit siulittaasuinut tunniunneqassaaq, kingornalu partiit siulersuisuunerinit atuaqqissaarneqasalluni.