Naalakkersuisunngortitsinermi tunngavik pillugu Kim Kielsen isumalluarpoq
- Qanoq ineriartussanersoq qimerluussallugu pissanganarpoq. Uanga akuersaarpara, tassami Nunatsinni politikikkut suliassat pingaaruteqartut arlallit danskit naalakkersuisuisa suliariniarpaat, Kim Kielsen oqarpoq.
Danskit naalakkersuisuisa Nunatsinni aporfiusinnaasunik nalunngisaqarluarnerannik, taakkulu pillugit pimoorussillutik suliniarnerannik Naalakkersuisunngortitsinermi tunngavigineqartup takutikkaa, Kim Kielsen isumaqarpoq.
Aamma atuaruk Danmarkimi Nunat Avannarlerni suleqatigiinnermut ministeri nutaaq
Amigaatit ukkanngilai
Nunarput pillugu suliassat tamarmik naalagaaffeqatigiinnerup iluani sammisami ilaatinneqanngikkaluartut, Kim Kielsen iluarisimaarinnippoq.
- Amerlasuunik amigaateqarluta oqarsinnaagaluarpugut, kisianni naalakkersuisunngortitsinermi tunngavik soorunami arlaatigut allanngortinneqarsinnaavoq. Folketingimi ilaasortaatitavut tamanna anguniarlugu aamma sulissuteqarniarput, Kim Kielsen oqarpoq.
Killiliisinnaavoq
Danmarkimi naalakkersuisut ikinnerussuteqarnissaat pissutigalugu Nunatta pissaaneqarneruniarnissaanut iluaqutissaalluarsinnaasoq, Nunarput sinnerlugu folketingimut ilaasortat marluullutik oqaatigereerpaat.
Aamma atuaruk Ikinnerussuteqartut sunniuteqarnerunermik kinguneqassaaq
Danskit naalakkersuisuisa ikinnerussuteqarlutik katersuunnerat Nunatsinnut periarfissanitsitsisinnaasoq, Kim Kielsen aamma isumaqarpoq, taamaakkaluartorli aporfiusinnaasunik aamma pilersitsisinnaaneranut ernumassuteqarluni.
- Tamanna aamma pissanganassaaq, kisianni Danmarkimi siullermeerlutik ikinnerussuteqartunik naalakkersuisoqalinngilaq. Tamanna unammillernartunik pilersitsisarpoq, aamma anguniakkatta iluatsinnissaannut killiliisinnaavoq, Kim Kielsen oqarpoq.