Naalakkersuisunngortitsinermi Siumut sisamanik naalekkersuisuutitaqalissaaq

Naalakkersuisunngortitseqatigiissinnaaneq anguniarlugu partiit isumaqatigiinnialeruttorput. Isumaqatgiinniarnerit saniatigut aamma naalakkersuisoqarfiit agguataarneqartussaapput inuttalersorneqarlutillu.

Siumut sinnerlugu isumaqatigiinniaqataasoq Mikael Petersen ullaap tungaa oqarpoq naalakkersuisoqarfiit arfineq pingasuusut agguataarneqassasut imaalillugit:

Inuit Ataqatigiit aammalu Atassut naalakkersuisoqarfinnik tamarmik marlunnik tigusissasut kiisalu Siumut naalakkersuisoqarfinnik sisamanik.

Periarfissaq taanna piviusunngussappat Inuit Ataqatigiinnit naalakkersuisunngortinnneqarsinnaasut tassaapput Josef Motzfeldt aamma Asii Chemnitz Narup.

Atassutikkormiut naalakkersuisunngortitassai tassaasinnaapput Ellen Christoffersen aamma Finn Karlsen.

Siumukkormiut naalakkersuisunngortissinnaasaat nalunarnerupput. Qularnanngilarli Hans Enoksen - i naalakkersuisunut siulittaasungussasoq.

Inatsisartunut qinersinermi Siumukkormiut akornanni qinerneqarnerpaat ilagaat Doris Jakobsen, Lars-Emil Johansen aammalu Aleqa Hammond. Taakku arlaannaataluunniit nalakkersuisunngorsinnaanermut angernerlutik naameernerlutilluunnit oqatigiumanngilaat.

Siumukkormiut inatsisartunut qinigaasut akornanni naalakkersuisunngornissamut naaggaartoq tassaavoq Agnethe Davidsen. Taassuma Nuummi Borgmesteriuinnarnissi aalajangiuteqqavaa.

Mannanmut naalakkersuisunngortitsiniarnissaq taama isiikoqarallartillugu, soorluuna Hans Enoksen-ip naalakkersuisunngortussanik qinersiniarnermini Inatsisartunut qinigaangitsunik naalakkersuisussaminik ujaasisariaqassaaq, periarfissanullu ilaavoq Tommy Marø.