Naalakkersuisunngorsinnaasut

Naalakkersuisut siulittaasuata Hans Enoksen-ip neriorsuutigaa naalakkersuisut nutaat marluk kingusinnerpaamik septemberip ulluisa qulinganni tusarliunneqassasut.

Massakkorpiarli atorfinnut inuttassarsiuneq ajornarsinnaassagunarpoq, amerlanerit radioaviisimit aperisavut qujaannarniaramik.

Radioaviisip ulluni kingullerni inuppaaluit atorfinnut piukkunnarsinnaasut oqaloqatigeqattaarpai.

Ineqarnermut Attaveqarnermullu naalakkersuisutut piukkunnarsinnaasunut ilaavoq Air Greenlandimi siulersuisuni siulittaasoq Peter Grønvold Samuelsen. Peter Grønvold Samuelsen-ili aperitissaguni naaggaarniarluni oqarpoq.

Aamma inatsisartunut ilaasortaq Ole Dorph atorfimmut qujaannarniarpoq.

-Tatigineqarnera qujassutigissavara, naaggaarniarpungali, Ole Dorph radioaviisimut oqarpoq.

Hans Enoksen Ineqarnermut Attaveqarnermullu naalakkersuisuusimasumik ikkusseqqinniaruni, periarfissaavoq Mikael Petersen.

Aaamali taanna oqarpoq naaggaarniarluni.

Taamaalilluni toqqaaniarnissaq Hans Enoksen-imut ajornakusoortorujussuussaaq.

Aalisarnermut Piniarnermullu naalakkersuisussamik toqqaaniarnissaq aamma ajornarsinnaavoq.

Royal Greenland-ip siulersuisuini siulittaasoq, siornatigullu Aalisarnermut Piniarnermullu naalakkersuisuusimasoq Paaviaaraq Heilmann aperitissaguni atorfimmut naaggaarniarpoq, aamma Nuka A/S-imi pisortaq Tønnes Berthelsen taamatut akiniarluni.

Periarfissat pingajuattut inississinnaavoq KNR-p pisortaanera Lars Lennert Sandgreen. Taanna aalisakkanik suliffissuarmi pisortatut atorfeqarsimavoq, naaggaarniarlunili aamma radioaviisimut nalunaaruteqarpoq.

Naalakkersuisussanik nutaanik marlunnik toqqaanissaq ajornakusoortutut isikkoqraluartoq taamaattoq suli periarfissaqarpoq. KANUKOKA-mi siulittaasuusimasup Jens Lars Fleischer-ip aperitissaguni eqqarsaatigilluaqqissaarumallugu oqarpoq. Borgmesterinngoqqammeramili nangaanartoqartippaa.

Periarfissaq alla tassaavoq Aalisarnermut Piniarnermullu naalakkersuisuusimasoq Simon Olsen.

Taanna radioaviisimut oqarpoq, aperitissaguni isumaliutiginiarlugu.

Oqaatigineqareersutut Hans Enoksen-ip naalakkersuisunngortussat marluk kingusinnerpaamik septemberip qulingani tusarliutissavai. Naalakkersuisooqataasut Inuit Ataqatigiit piumasarinikuuaat naalakkersuisunngortussanut akuerseqataaniarlutik.