Naalakkersuisunngorlaat ilisaritippavut
Naalakkersuisunngorlaat marluk taarsikkaminnut sanilliullutik toraagaqarnerullutillu sorraannerupput.
Tassalu taakkuupput inatsisartuni ilaasortat Tommy Marø aammalu Agathe Fontain.
Taakku politikkikkut tunuliaqutaat ima oqaluttuarisinnaavagut.
Asii Chemnitz Narup-ip Peqqissutsimut naalakkersuisutut issiavia Agathe Fontainimit taarserneqassaaq.
Agathe Fontain Sisimiuni 1951-mi junip qulingiluaani inunngorpoq, KNAPK-mi siulittaasuusimasoq Leif Fontain uigaa pingasunillu qitornaqarput.
1973-imi Danmarkimi omsorgspædagogitut ilinniakkani naammassivaa.
Taamatuttaaq 1980-kkut aallartilaarneranni tusilartunut ussersornermik ilinniareerami 1988-imi Sisimiuni isumaginninnermi pisortaqarfiup ataani tusilartunut siunnersortitut atorfinippoq, taamalu aamma tusilartut atuarfianni ningiunngorluni.
Agathe Fontain 1993-imi Sisimiut kommunalbestyrelseanut qinigaagami politikkikkut inuunera aallartippoq. 2000-imilu naligiissitaanissamut siunnersuisoqatigiinni aamma siulittaasunngorpoq. Ukiullu marluk qaangiummata tassa 2002-mi inuit ataqatigiit tunuliaqutaralugu Inatsisartunut aamma qinigaavoq.
Ullumikkullu novembarip 15-iani Peqqissutsimut naalakkersuisunngornissi akueraa.
- Illuatungiliuttunut akiuussinnaassagaanni sorraassusermik peqarsinnaasariaqarpoq, toraagaq malillugu sulissaanga akiuussinnaassuseqarluarpungalu, Agathe Fontain nammineerluni Asii Chenmitz Narup-ip tunuarnera pillugu ugguartoq oqarpoq.
Naalakkersuisunngortup aappaa Ilinniartitaanermut naalakkersuisunngortoq Tommy Marø 1964-imi septembarip 19-iani Qaqortumi inunngorpoq, taanna aatsaat naalakkersuisuunermik misiliilinngilaq, 2005-imi Siumukkut IA-kkullu naalakkersuisooqatigiinnerisa nalaanni Ilaqutariinnermi naalakkersuisuuvoq.
Tommy Marø-p politikkikkut inuunera aallartippoq, 1994-imi Meeqqat inuusuttullu kattuffianni Sorlammi siulittaasunngornermi kingorna.
1997-imi Qaqortumi kommunalbestyrelsemi qinigaavoq 1999-imilu inatsisartunut qinigaalluni, ukiullu marluk qaangiummata 2001-imi Qaqortumi borgmesterinngorpoq.
- Ilinniartitaanermi nutaamik aallartitsineq assut pissangagaara, Tommy Marø oqarpoq.
