Naalakkersuisunngorlaap NunaMineralsip aningaasarliornera oqaaseqarfigiumanngilaa
Nuup Kangerluani savimminissarsiorfik, London Mining ingerlanerloqisoq ingerlatsivissuarmit kinamiunit pigineqartumit qanittukkut pisiarineqarpoq. Maanna "London Mining Greenland Jersey"-imik piginneqataanermut aktiat tamarmik ingerlatsivissuarmit, General Nice Developementimit pigineqalerlutik.
Tamanna aatsitassanut naalakkersuisup pissanngatigalugu oqarpoq.
- Suliffeqarfiup taama angitigisup London Mining tigummagu, tassami uku anginerupput, misiliitagaqarnerupput aningaasaateqarnerullutillu. Taamaammat siunissaq eqqarsaatigalugu isumalluarnartorujussuuvoq, Anda Uldum KNR-imut oqarpoq.
Taanna aamma oqarpoq piumasaqaatit tunngaviillu allanngortinnagit, piginnittut nutaat London Mining ingerlateqqissagaat.
Anda Uldumip piginnittut nutaat kinamiuusut suli naapissimannginnerarpai, naak Radioaviisip tusarfiinit kinamiut aningaasaatilissuit qanittukkut Nuummiittut oqaatigineqareeraluartoq.
NunaMineralsimi aamma pisoqalaavippoq. Tusatsiakkat kingulliit naapertorlugit misissueqqissaartarfimmi, NunaMineralsimi, siulersuisut aningaasaliisartuusunut immikkut ittumik, sapaatit akunneri arlaqanngitsut qaangiuppata, ataatsimeeqatigiinnissamut aggersaaniarput.
Aviisilu Sermitsiaq naapertorlugu ingerlatsiviup nalinga 0 koruuninngortinniarneqarpoq, taamaaliornikkut Namminersorlutik Oqartussat oqartussaaffeqarnerulernissaat ingerlatsiviullu annaanneqarnissaa siunertarineqarluni. Tamannalu aningaasaliisartunit pakatsissutigineqarsinnaavoq.
Tamannali Aningaasaqarnermut Aatsitassanullu Naalakkersuisup akisussaaffiginnginnerarpaa oqaaseqarfigiumanagulu.
- Naalakkersuisut siulittaasuata susassaqarfigimmagu innersuussutigisariaqassavara, taanna aktianik piginneqatigiiffinnut tunngasunut akisussaasuummat, Aatsitassanut Aningaasaqarnermullu Naalakkersuisoq, Anda Uldum taama oqarpoq.
Urani eqqarsaatigalugu Anda Uldum oqarpoq, urani pillugu Danmarkimit nassuiaasoqarnissaa utaqqimaarlugu. Taamatuttaaq qinngornerit ulorianartut qaffasinnerpaaffissaannik killiliussassamik, Inatsisartunut siunnersuusiortoqarnavianngitsoq aamma oqaatigalugu.
