Naalakkersuisunik nikittoqarnera pillugu PIP-p siulittaasua ernumavoq

juunip 22-at 2007 06:28

Kulturimut Ilaqutariinnermullu naalakkersuisoqarfiit kattutsinneri Perorsaasut Ilinniarsimasut Peqatigiiffiannit eqqarsarnartoqartinneqarpoq.

Siulittaasuata Kaaliina Skifte-p aarleqqutigaa, suliassat isumaginninnermut tunngasut, oqimaareeqisut, tunulliunneqalissasut.

Kaaliina Skifte ima oqarpoq:

-Assorujussuaq eqqarsarnartoqartippara, tassami unga isumaga naapertorlugu, taama suliassaq annertutigisoq, inunnik isumaginnittoqarfik ataatsimik immikkorluinnaqqissaaq ittumik naalakkersuisoqartussaassagaluarami.

Meeqqanut innarluutilinnullu suliarisartagaannut tamanna qanoq kinguneqassangatinneraa Kaaliina Skifte aperineqrami ima akivoq:

- Innarluutillit eqqarsaatigalugit, inunnik isumaginninneq ataatsimut eqqarsaatigalugu, suliassat taama annertoreertigisut, tamakkiisumik suliariniassagaanni, taannarpiaannaavik inuup ataatsip suliaralugu pisussaagaluarami. Qaapiartumik suliarineqarnissai uanga annilaangassutigaara, tassa suliarineqarnera qaapiartumik ingerlateqqinneqalissasoq isumaqarpunga.