Naalakkersuisunik nikititerinerup Nunatsinnut tunngasunut sunniuteqapilunnginnissaa Aleqa Hammondip neriuutigaa

Ministeriaqarfit nutaamik ministereqarlertussat ilagaat nunanut allamut tunngasunut ministeriaqarfik, SF-imeeersumit Holger K. Nielsenimit maannamut aqunneqarsimasoq.

Suliallu maanna ingerlanneqartut kinguarsarneqarnissaat, Naalakkersuisut siulittaasuata Aleqa Hammondip aarleqqutigaa.

Puisit amiinik EU-mut eqqusseqqusinnginnermik atorunnaarsitsiniarluni suliaq tamakkununnga ilaavoq.

- Kingunerisinnaasaa tassaavoq puisit amii pillugit suliniarnermi tunngavilersuutip naalakkersuinikkut nukittuallaanngitsumik inissittoorsinnaanissaa aarleqqutigineqarsinnaammat, Naalakkersuisut siulittaasuat Aleqa Hammond taama oqarpoq.

Danmarkip Kalaallit Nunaatalu ukiuni arlaqalersuni nunat tamat arfanniarnermut ataatsimiititaliaani IWC-imi ilaasortaaneq oqallisigisimavaat.

Arfanniarneq pillugu ataatsimiititaliarsumit ilaasortaajunnaarnissaq Danmarkip siornatigut nalunaarutiginikuuaa, arfernik angisuunik IWC-ip pisassiisarnera Danmarkip Kalaallit Nunaatalu isumaqatigineq ajormassuk.

Arfattassat pillugit isumaqatigininniarnissami Danmarkip Kalaallit Nunaatalu ataatsimoorlutik sulinerat nunanut allanut tunngasunut ministerip taarserneqarneratigut aamma kinguarsarneqarsinnaavoq, tamannalu nukilaaqutaasinnaasoq, Aleqa Hammond oqarpoq.

- Arfanniarneq pillugu isumaqatiginniarnissaq sioqqullugu, Danmarkip Kalaallit Nunaatalu ataatsimoorfissaat kinguarsarneqarsinnaavoq nukilaaqutigisinnaavarpullu, tamannali naatsorsuutiginngilara Danmarkimi naalakkersuisut siulittaasuata toqqissisimasumik piaartumik aaqqivigineqarnissaanut siunnerfigissagaa, Naalakkersuisut siulittaasuat oqarpoq.

Puisit amiinik EU-mut eqqusseqqusinnginnermik atorunnaarsitsiniarneq Nunat tamalaat niueqatigiinnikkut suleqatigiiffiata WTO-p eqqunngitsuliornertut naliliiffigaa. WTO-p taamatut naliliinera EU-mut suliassanngortinneqarpoq, Naalakkersuisullu siulittaasuata neriuutigaa Danmark suleqatigilluinnarlugu ingerlanneqarumaartoq.

Suliaq taanna Danmarkimi nunanut allanut tunngasunut ministerip suliaasa ilagaat.

- Pingaaruteqarluinnartuuvoq nunanut allanut tunngasunut ministerip nunatta nipaa aamma nunarput isumaqatiginniarnermi illersorfissaatitaaffeqarfigivaa anginerpaamik, neriuppunga puisit amiinut tunngasoq nunatsinnut arlaatigulluunniit eqquinerluissanngitsoq, taamaattumik nunanut allanut tunngasunut ministeri nutaaq ikkunneqariarpat, uagut suliatsinnik nangitsiffigalugu ataatsimeeqatigissavara, Naalakkersuisut siulittaasuat Aleqa Hammond taama oqarpoq.

Danmarkimi naalakkersuisut nutaat ullumi ivertinneqarput.