Inuit Ataqatigiinnit Naleqqamiillu Inatsisartunut qinikkat katillugit 16-iupput. Tassalu Atassut ikorfartortaajunnaaraluartoq suli amerlanerussuteqarput.Assi: Malik Brøns / KNR

Naalakkersuisuni nikerarneq: Naalakkersuisut siulittaasuata patajaatsuunissaq pingaartippaa

Politikkikkut sulinerup patajaatsuunissaa qulakkiissallugu, Naalakkersuisut siulittaasuata pingaartitaraa. Taassuma naalakkersuisut marluk tunuarnerat, partiillu ikorfartortaasup tunuarnera uggoraa.

Inuit Ataqatigiit Naleqqallu naalakkersuisoqatigiinnissamik isumaqatigiissutaanni patajaassuseq qitiusunut ilaavoq.

- Patajaatsumik ingerlanissaq, aammalu naalakkersuisoqatigiit siunnerfimminnik naammassisaqarnissaat qulakkiissallugu uanga suliassaraara pingaarnerpaaq. Soorunami ajuusaarnartuuvoq, naalakkersuisunut ilaasortat marluk qinigaaffiup aallartinneraninngaanniit tunuarlutik inissinnikuummata, Múte Bourup Egede oqarpoq.

Eqaluk Høegh meeqqanut naalakkersuisutut siullermik tunuarpoq. Taava Pele Broberg nunanut allanut tunngasunut naalakkersuisuujunnaarpoq. Asii Chemnitz Narupilu aningaasaqarnermut naalakkersuisutut ippassaani tunuarpoq.

- Peqqissutsimik aammalu nammineq toqqaanermik aallaaveqartoq taanna ataqqisariaqarpoq. Tassanngaanniillu uagut suleriaqqinnermi ingerlanissarput, naalakkersuisoqatigiinnissamullu isumaqatigiissummik tunngaveqartumik sulilluarnissarput qulakkiigassaraarput, Múte Bourup Egede oqarpoq.

Inissianik attartortitsinermut suliaq suli ilungersortitsisoq 

Asii Chemnitz Narup Kommuneqarfik Sermersuumi ineqarneq pillugu suliamut atatillugu tunuarpoq.

Narup Kommuneqarfik Sermersuumi inissianik attartortitsinermut periutsip isornartorsiorneqartup aallartinnerani borgmesteriuvoq.

Nuummi inissaaleqineq aaqqiiviginiarlugu Kommuneqarfik Sermersuup amigartoorluni attartortitsinerata saniatigut, taamatut iliuuseqarneq aamma maleruagassanut unioqqutitsineruvoq. Tamannalu kommunini nakkutilliisoqarfimmiit borgmesterimut isornartorsiorneqangaatsiarpoq.

AAMMA ATUARUK Charlotte Ludvigsenip borgmesteriuinnarnissaa Naleqqap taperserallaraa

Asii Chemnitz Narup immaqaluunniit Charlotte Ludvigsen sorleq isornartorsiorneqarnersoq uani erseqqinngilaq.

Aningaasaqarnermulli maanna naalakkersuisuusimasoq atuuffimminit tunuarpoq.

Siulittaasoq: Aningaasanut inatsisip Naalakkersuisut ataatsimoortitsisinnaanerannik takutitsisoq

Asii Chemnitz Narupip aningaasanut inatsimmut isumaqatigiinniarnerit tunuannginnermini naammassivai, aningaasanullu inatsit partiinit tamanit akuersissutigineqarpoq.

- Soorunami isummat assigiinngitsut naapeqatigiinnissaat taanna suliassarivarput uangalu nunap siuttuatut suliassara pingaarneq tassaniippoq. Ilaatigullu Naalakkersuisunut ilaasortat aamma ataatsimoortitsinermik taamatut suliaqarnikkut qulakkiigassaqarlutik. Isummat assigiinngikkaluartut, anorersuartut immaqa isikkoqarsinnaagaluartut aamma sila qatsortarpoq.

- Silallu qatsornissaanik ilaatigut aningaasanut inatsit partiinit tamanit ippassaq taaseqataaffiusoq takuarput, ataatsimoorsinnaaneq Naalakkersuisut suliaminni aamma pilersissinnaagaat.

AAMMA ATUARUK Atassut trækker sin støtte til Naalakkersuisut

Tamatigulli ataatsimoortoqarsinnaanngilaq. Atassummi naalakkersuisoqatigiinnut ikorfartortaajunnaarluni ippassaq nalunaarpoq.

Naalakkersuisoqatigiit Atassutillu isumaat assigiinngippallaartut Atassutip siulittaasuata Aqqalu Jerimiassenip Múte Bourup Egedellu akueraat.

- Atassutip taamatut aalajangernera ataqqivara. Aamma naalakkersuinikkut namminiissuseqarlutik ingerlanissaminnut toqqammavissaq annerpaaq, aammalu naalakkersuisoqatigiit massakkut suliaannut avissaartuunnertut isikkoqarpallanngitsumik ingerlasarnissamik qulakkeerinneqataarusullutik namminnerlu namminiissuseqarnissartik qulakkeerusummassuk taanna ataqqivara, Múte Bourup Egede oqarpoq.

Inuit Ataqatigiinnit Naleqqamiillu Inatsisartunut qinikkat katillugit 16-iupput. Tassalu Atassut ikorfartortaajunnaaraluartoq suli amerlanerussuteqarput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat