Naalakkersuisuni ammaneruneq

marsip 27-at 2007 11:16

Inatsisartut kukkunersiuinermut ataatsimiititaliaata misissortussanngorpaa, Namminersornerullutik Oqartussat suliffeqarfiutaanni naalakkersuisut soqutigisaminnik qanoq ingerlatsisarnerat pillugu paasissutissiisoqartarsinnaanersoq.

Tamanna naalakkersuisooqataasut Atassutikkut siunnersuuteqarnerannik patsiseqarpoq. Naalakkersuisoqatigiinni amerlanerussuteqartut, tassa Siumup aamma Inuit Ataqatigiit siunnersuut tunuarteriaraluarpaat, kisianni Inatsisartuni amerlanerussuteqartut siunnersuutip ataatsimiititaliamut ingerlateqqinneqarnissaa aalajangiuppaat.

Suliffeqarfissuarmi KNI-mi amigartoorujussuarneq oqallinnermi eqqaamaneqarunarpoq, naak suliffeqarfissuaq taaneqallatsiaannartaraluartoq.

- Inatsisartut arlaleriarlutik amigartoorutinut millionilikkaanut aningaasaliissuteqartariaqartarsimapput, kukkusumik aningaasaliinerit kingunerisaannik. Taamaattumik Inatsisartut suliffeqarfiit qanoq ineriartortinneqarnersut takusinnaasariaqarpaat. Paasisinnaalluarparput niuernermut tunngasut eqqarsaatigineqartariaqarmata aamma imaassinnaavoq ukiumoortumik nalunaarusiat matoqqasumik tunniunneqartariaqartut, Atassummit siunnersuuteqartoq Godmand Rasmussen oqarpoq.

Kisianni tamanna naalakkersuisut siulittaasuata Hans Enoksenip toqqissisimanartinngilaa:

- Ataatsimiinnernit matoqqasunit avammut tusarliussisoqartuaannarpoq. Kisianni paasissutissat suliffeqarfiit ukiumoortumik nalunaarutaannit pissarsiarisarpasi. Naalakkersuisut isertuussaqanngillat, aamma pisuutitsiniarnerit qatsulluinnarpakka, Naalakkersuisut siulittaasuat oqarpoq.

Atassut Demokraatinit aamma Kattusseqatigiit Partiiannit taperserneqarpoq, aamma siunnersuutip ataatsimiititaliamut ingerlateqqinneqarnissaa Inuit Ataqatigiit akuersaarpaat. Taamaattumik Inatsisartut kukkunersiuinermut ataatsimiititaliaata maanna misissortussanngorpaa, Namminersornerullutik Oqartussat suliffeqarfiutaanni suliniutinut tunngasunik paasissutissiisoqarnerusinnaanersoq.

Atassutip siunnersuutaa alla Namminersornerullutik Oqartussat suliffeqarfiutaanni Naalakkersuisut akisussaanerisa sukateriffigineqarnissaannut tunngasoq tapersersorneqanngitsoorpoq.