Akunneq ataaseq qaangiuttoq naalakkersuisunngortitsiniarlutik isumaqatigiinniartut Siumut, Inuit Ataqatigiit aammalu Atassut isumaqatigiinniartartui naapeqqipput.
Isumaqatigiinniartut aarlaannaataluunnit oqaatigisinnaanngikkallarnerarpaa isumaqatigiinniarnerit qanoq inerneqarumaarnersut, kisianni Jonathan Motzfeldt, Siumut sinnerlugu isumaqatigiinniarnernut peqatasoq, oqarpoq isumaqatigiinniarnerit ingerlalluartut.
Isumaqatigiinniarnerni partiit siulittaasui peqataanngillat. Naalakkersuisunngortitsiniarnermi isumaqatigiinniartunut peqataasut tassaapput Mikael Petersen aammalu Jonathan Motzfeldt, Siumut, Kuupik Kleist aamma Asii Chemnitz Narup, Inuit Ataqatigiit, kiisalu Knud Christiansen aammalu Atassutip allattaa Steffen Silaassen.
Isumaqatigiinniartut ullumi ulluniluunniit qaninnerni isumaqatigiissuteqassappata, taava Namminersornerulerattali aatsaat siullermeersumik partiit pingasut naalakkersuisunngortitseqatigiissapput.