Naalakkersuisoqatigiit: Suliniutinut angisuunut inatsisitaami sulisartut pitsaanerunik atugassaqartinneqassapput

IA-p Siumut sapaatip-akunnerani uani sakkortuumik isornartorsiorpaa. IA-mit oqaatigineqarpoq suliniutinut angisuunut inatsit partiip paasisimanngikkaa. Aatsitassanut naalakkersuisoq Jens-Erik Kirkegaard maanna akerliliilluni akissuteqarpoq.
aggustip 21-at 2013 09:25

Kirkegaard isumaqarpoq naalakkersuisoqatigiit siulimi inatsit nalunaaquttap akunneri 24-t iluanni aappassaanerlugu pingajussaaneerlugulu tuaviuullugu akuersissutigisimagat. Siumut taaseqataanngilaq, inatsit sukumiisumik suliarineqarsimanngitsutut nalilerlugu.

- Suliniutinut angisuunut inatsisip akuersissutigineranut atatillugu Kalaallit Nunaannit aamma nunanit allanit isornartorsiutaasup ilaa pinaveersimasinnaagaluarpoq Inuit Ataqatigiit Inatsisartunut kalaallit sulisartut kattuffiisa inissisimaffiinik isumannaarisinnaasunik malittarisassianik aalajangersakkanillu ilanngussuinissaannut piffissaliisimagaluarpata, Jens-Erik Kirkegaard oqarpoq.

Kalaallit sulisartut kattuffiisa suliumajunnaarsinnaatitaanerat, aamma sulisartumut nuna allameersumut ataatsimoorussamik isumaqatigiissuteqarnissamut anguniagaqarnermi tapersersuinerminut atatillugu ataatsimoorussamik akerleriissuteqarnermi alloriarnernik iliuuseqarsinnaanerat siunnersuutip erseqqissaavigissavai.

Siunnersuutikkut nuna allamiumut sulisartumut sulisartup nerisaqarlunilu najugaqarneranut, sullisaanut, akiliunneqarluni angalasarneranut, kiisalu sillimmasiinermut atatillugu aningaasartuutinik sulisitsisoq isumaginninnissamut matussusiinissamullu pisussaaffeqarnera siunnersuutikkut isumannaarneqassapput.

- Suliniutinut angisuunut atatillugu kalaallit sulisartut kattuffiisa inissisimaffiannik sunniuteqarsinnaanerannillu, minnerunngitsumillu nunanit allanit sulisartunut pissutsinik pitsanngorsaaniarnernut iluarsiissutinik malunnaatilinnik suliniutinut angisuunut inatsisip allanngortinnissaa pillugu Inatsisartut inatsisissaattut siunnersuut imaqarpoq,  Jens-Erik Kirkegaard oqarpoq.