Naalakkersuisoqatigiit iluanni erloqinartorsiortoqarpoq

Tamakku oqallisigineqaleruttornerani, Namminersorlutik Oqartussani pisortat taarseraannerujussuat, Naalakkersuisoqatigiinni partiit ilaannit, Atassummit isornartorsiorneqarpoq. Partiip siulittaasua, Gerhardt Petersen tamanna pillugu ima oqarpoq.

- Naalakkersuisoqatigiinneq qaqugukkulluunniit partiinit tamaginnit apersuuserneqartariaqarpoq. Atassutillu maanna killiffigaa Naalakkersuisoqatigiinnermik nalilersuissallutik. Maannakkuugallartorlu oqarsinnaanngilanga suleqatigiinnermik anissanerluta.

Atassutip siulittaasua, Gerhardt Petersen Qanoruumut ippassaq taama oqarpoq.

Aningaasaqarnermut Nunamullu Namminermut Naalakkersuisoqarfimmi pisortanngoraluartoq Carsten Frank Hansen, ulluialunnguit atorfimmini issiareerluni soraarsitaavoq, tamatumalu kinguneranik Namminersorlutik Oqartussat iluani susoqarnersoq apeqquserneqartalerluni.

Atassutillumi aamma tamanna apeqquserpaat ingerlariaqqittoqarnissaalu ujartorlugu.

- Ukiup affaata missaani taama ingerlareerpugut, maanna pisariaqalerpoq politikkikkut oqallittoqarluni aaqqiisoqarnissaa uangullu tamanna peqataaffigissavarput.

Naak Atassutip siulittaasua, Gerhardt Petersen maanna pisunut isumalluarpallaanngikkaluarluni qanoq iliuuseqartoqarnissaa neriuutigaa.

- Naalakkersuisut siulittaasuata pissutsit aaqqissagai tatigilluinnarparput aammami partiit ataasiakkaat aaqqeeqataanissaat tatigilluinnarlutigu.

Atassutip siulittaasua, Gerhardt Petersen Qanoruumut ippassaq taama oqarpoq.