Partiit marluk siulittaasuisa IA-p Siumullu suleqatigiinnerat ukiakkut ataatsimiinnerit naammassineranni neriuuteqarfigilluarpaat.Assi: KNR

Naalakkersuisoqatigiinni aaqqiagiinngittoqareersoq: Suleqatigiinneq pitsaasuuvoq

IA-mit ilaasortap oqaaseqarnera naalakkersuisoqatigiinni aalassassusitigineqarmat Siumup Inuit Ataqatigiit sumi inissisimanersoq paaserusuppaa.

- Ajoraluartumik Siumut naalakkersuisoqatigilerpagut, erseqqissassavaralu - ajoraluartumik.

IA-mit Kristian Jerimiassen Inatsisartuni oqaaseqartarfimmit novembarip ulluisa aqqarnanni oqarpoq.

IA-p Siumullu atassuteqarnerat ulloq taanna misiligarneqangaatsiarpoq.

Politikkikkut suleqatigiinneq aappariinnertut isigigaanni tamatuma kingornali aappariinnerliorput.

Kristian Jeremiassenip oqaaseqarnera Siumumit sakkortuumik qisuariarfigineqarpoq, naalakkersuisoqatigiillu partiit marluusut avinnerannik kinguneqarsinnaagaluarpoq.

AAMMA ATUARUK Naalakkersuisooqatigiit aaqqiagiinngitsut

Pissutsilli allanngorsimarpasipput.

- Inuit Ataqatigiinnut tunngarpasippoq. Tamanna akuliuffigerusunngilarput, kisianni sumi inissisimanerat paaserusullugu piumasaqarnikuuvugut.

- Isumaqarpunga annertunerusumik tusagassiorfitsigut oqallinneq pinngikkaluarlugu, kisianni naalakkersuisoqatigiinneq pitsaasumik ingerlasoq naqissusissagipput, Siumup siulittaasua, Erik Jensen oqarpoq.

Aappariiginnassasut

Inuit Ataqatigiit siulittaasuata, Múte B. Egedep suleqatigiinnermi unammillernartoqartaraluartoq suleqatigiilluartoqartoq erseqqissaatigaa. Ataqatigiinnerisa ajutoornissaanut qanoq qanitsigigaluarnersoq aperineqarami erseqqinngitsumik akivoq:

- Suleqatigiinneq pitsaasutut isigivara. Soorunami unammilligassaqartarpugut suleqatigiit iluanni, Muté B. Egede oqarpoq.

Kristian Jeremiassenip (IA) oqaaseqarnermini sakkortuuliorsimalluni kingorna oqaatigaa.

- Soorunami taamatut naalakkersuisoqatigiit ajortumik ingerlanissaannik siunertaqanngilanga, aamma Inatsisartut ataatsimiittarfianni utoqqatsissuteqarpunga.

Naalakkersuisoqatigiinni partiit siulittaasui ukiakkut ataatsimiinnerup naanerani ippassaq oqaloqatigiipput, ingerlaqqissimallutillu.

- Isumaqarpunga naalakkersuisooqatigiinneq ajunngitsorujussuarmik ingerlasoq, Erik Jensen oqarpoq.

- Suleqatigiinneq isumaqarpunga pitsaasumik ingerlanneqartoq aammalu taanna toqqammavigalugu sulinerput ingerlateqqissavarput, Muté B. Egede oqarpoq.

Taamaalilluni aappariit ilungersunartumik siullermeerlutik ingerlanerliornertik qaangersimarpasippaat, Inuit Ataqatigiit Siumullu taamaalillutik piffissami qaninnermi aappariiginnartussaarpasipput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl