Naalakkersuisoqatigiilernissamut isumaqatigiissut saqqummiuppaat

Venstret Konservativillu naalakkersuisooqatigiileqqinnissaminnut isumaqatigiissutaat nutaaq, tassaasoq akileraartarnerup nutarterneqarnissaa annertooq saqqummiuteqqammerpaat.

- Naalakkersuisooqatigiinnissatsinnut isumaqatigiissut nutaaq, Folketingimilu partiinit amerlanernit akuuffigineqarsinnaasoq nuannaarutigalugu saqqummiuppara. Taama Anders Fogh Rasmussen ungasinngitsukkut tusagassiortunik katersuuttitsinermi naalakkersuisooqatigiiligassani Bendt Bendtsen peqatigalugu oqarpoq.

Anguniagaallumi tassaavoq sulinermi akileraarutinik akiliisarnermi annertuumik millisaaneq, koruunillu isertitap kingulliup akileraarusersorneqartarnera – tassa topskat-imik taasagaat – apparneqarnissaanik isummersuut.

Naalagaaffiup akileraarutinik isertittagai annaaneqartussat akitsuutinik qaffaanermikkut uterteqqinniartussaassavaat; ilaatigut akitsuutinik qorsunnik taasagaanik qaffaanermikkut.

Ineqarnermulli akileraarutaasartut attorniarneqanngillat.

- Sulilluni isertittakkat akileraarusersorneqartarnerat malunnaatilimmik annikillisarniarparput. Naalakkersuisummi isumaqarput sulisartutut inuuneq imminut akilersinnaanerusariaqartoq, taama Anders Fogh Rasmussen oqarsimavoq.

- Akileraarutinik qaffaaqqinnginnissaq attatiinnassavarput. Qaffaaqqinnginnissamut isumaqatigiissut atuuttoq akileraarutit pillugit nutarterinissaq atuutileraluarpalluunniit atuutsinneqaannassaaq, taama ministeriunerup naqissuserpaa.

- Akileraarusersuisarnerup nutarterneqarnissaa akileraarutsit qaffaqqinnginnissaanik eqqarsariaatitsinnut naapertuutissaaq. Akileraarusersuisariaatsip nutarterneqarnissaanut atatillugu akileraarutit, akitsuutilluunniit sumiiffimmi ataatsimi qaffanneqarpata, taava sumiiffimmi allami appariartussaassapput, taama ministeriuneq unnerpoq.

Akileraarutit pillugit isummersortartoqatigiit – tassa skattekommissioni – pilersaarutit malillugit pilersinneqassapput, taakkualu ukioq 2009 nallertinnagu nalunaarusiortussaassapput.

Tamakku naalakkersuisooqatigiinnissamut isumaqatigiissummi quppernernik 70-inik quppernilimmi ”Inuiaqatigiit periarfissagissaartunik” qulequtserneqarsimasumi atuarneqarsinnaapput.

Akileraarutinik isumaqatigiissummili Dansk Folkeparti akuusariaqassaaq, tassami massakku isumaqatigiissutaareersoq qinersinissallu tullissaanut atuuttoq naalakkersuisut unioqqutikkusunnginnamikku.

Naalakkersuisooqatigiinnissamullu isumaqatigiissut nutaami malunnarpoq, Danskit EU-mut suleqateqarnermi nangaassutaat sisamaasut ilaasa allanngortinneqarnissaat eqqarsaatersuutigilersimavaat.