Naalakkersuisoqarfiup nuunneqarnissaa Sulisitsisut Kattuffiata akerleraa

Inuussutissarsiutinut Ilinniartitaanermut tunngasut Kultureqarnermut, Ilinniartitaanermut, Ilisimatusarnermut, Ilageeqaarnermullu Naalakkersuisoqarfimmut nuunneqarnissaat Sulisitsisut Kattuffiata akerleraa.
oktobarip 27-at 2008 11:30

Ilinniartitaanerit ataatsimoornerulernissaat siunertaasoq, pisortaanerup Kaj Kleistip oqaatigaa, tamannali Sulisitsisut Peqatigiiffiata GA-p kukkunerusoraa:

Sulisitsisut Peqatigiiffiani allaffimmi pisortaq Karsten Klausen oqarpoq Inuussutissarsiutinut ilinniartitaaneq inuussutissarsiornermut suliffeqarnermullu tunngalluinnarmat, taakku naalakkersuisoqarfianniinnerat assut iluarisimaaritsik. Maannali naalakkersuisoqarfimmut allamut nuunniarneqalernera isornartoqartippaa.

- KIIIIN-iminngaanniit nuunneqarneratigut malugilluarsimavarput inuussutissarsiutinik ilinniartitaanerit sumiiffinni tamani pitsaanerusumik ingerlanneqalersut. Allaammi inuusuttut ilinniarnermik ilarujussua suliffimmi atorsinnaanngorsimavaat, piffissaq atuagarsorfiusoq sivikinnerulersimalluni. Taamaaliorneq pitsaasutut nalilerparput, Karsten Klausen oqarpoq.

Namminersornerullutik Oqartussani Naalakkersuisut siulittaasoqarfiani pisortaq Kaj Kleist oqarpoq, naalakkersuisoqarfimmut allanut nuutsineq ataqatigiissumik ilinniartitaalernissamik siunertaqartoq.

- Tusagaq ajunngikkaluarpoq. Uagulli Sulisitsisut Peqatigiiffiani GA-mi maanna ingerlaaseq ajornartorsiutaaasutut taarusunngilarput. Suliffeqarfiimmi ilaasortatta ilinniartoqarnertik ajornaquteqanngitsumik Inuussutissarsiornermut, Suliffeqarnermut aamma Inuussutissarsiutinut Ilinniartitaanermut Naalakkersuisoqarfik suleqatigalugu ataqatigiissaartarpaat. Inuusuttummi meeqqat atuarfiannit aniinnarlutik inuussutissarsiummik ilinniarsinnaalersarput. Ilinniartitaaneq inuussutissarsiutinut naalakkersuisoqarfimmiit ilinniartitaanermut naalakkersuisoqarfimmut utimullu nuutsinneqaqattaarnera 2006-imi 2007-imilu pisarsimavoq, tamannalu suliffeqarfinnut ilinniartoqarniartunut soorunalumi aamma Inuussutissarsiutinut Ilinniartitaanermik sulialinnut ilungersunarsimavoq. Suliaat ingerlalluareersoq sooq allanngortiteqqinneqassava? Eqqissillutik suliniarlik, pisariaqartippaat. Sulisitsisut kaammattuipput.