Naalakkersuisoqarfiup ingerlatseriaasia isornartorsiorneqartoq

Inatsisartut Ombudsmandiat Vera Leth, suliat taakku marluk nammineq misissuiffiginiarlugit aalajangerpoq.

Naallu malittarisassanik unioqqutitsisoqarsimanngikkaluartoq, ingerlatseriaatsimik isornartorsiuisoqarpoq.

Naalakkersuisut siulittaasuata Naalakkersuisoqarfiani suliat taakku marluk innuttaasunit soqutigineqarnerujussuat pissutaalluni pissutsit eqqartuussissuserisumit misissorneqarnissaat, Naalakkersuisut Siulittaasuata Naalakkersuisoqarfiata aalajangerpaa.

Suliallumi taakku marluk innuttaasunit soqutigineqarnerujussuat aamma pissutaalluni, eqqartuussissuserisup nassuiaataata tamarmi Naalakkersuisut nittartagaanni tamanut saqqummiunneqarnissaa aamma aalajangerneqarpoq.

Naalakkersuisullu siulittaasuata naalakkersuisoqarfiani inatsisilerinermi pisortamut tunngasut ilamerngi tamanut saqqummiunneqarnissaannut aalajangernermut pissutissaqarnersoq, Inatsisartut Ombudsmandiata misissuiniarluni nammineerluni aallartippaa.

Ombudsmandilu isumaqarpoq eqqartuussissuserisup nassuiaataanik tamanut saqqummiussineq - inatsisilerinermi pisortamut tunngasumi - pisortat ingerlatsineranni nipangiussisussaatitaaneq pillugu malittarisassanik nalinginnaasunik unioqqutitsinerusinnaanavianngitsoq. Inatsisartut Ombudsmandiata nassuiaataani ilaatigut taama inerniliisoqarpoq, ombudsmandillu nittartagaani tamanna atuarneqarsinnaalluni.

- Tamanna suliap innuttaasunit soqutigineqarnerujussuanut nipangiussisussaatitaanerlu pillugu malittarisassanik atuinerup pisut ataasiakkaarlugit pisunik naliliinermik tunngaveqarneranut ilaatigut ataneqartillugu isigineqassaaq, Inatsisartut Ombudsmandiat Vera Leth, nassuiaammi ilaatigut allappoq.

Ombudsmandili isumaqarpoq Naalakkersuisut Siulittaasuata Naalakkersuisoqarfiata tamanut saqqummiussineq sioqqulluarlugu Naalakkersuisut inatsisilerinermi pisortaq ilisimatissimasuuppagu eqqartuussissuserisullu nassuiaataa tamatumunnga peqatigitillugu inatsisilerinermi pisortamut saqqummiussimasuuppagu tamanna mianerinninnerpaamik iliuuseqarnerusimassagaluartoq, inatsisilerinermilu pisortaq taamaaliornikkut soqutigisaminik isumaginnissinnaasimassagaluartoq.

Naalakkersuisut Siulittaasuata Naalakkersuisoqarfiata nassuiaatip ilaanik inatsisilerinermi pisortap inuttaanik nikanarsaasutut kusananngitsumillu avammut nittarsaassinertut erseqqissumik paasineqarsinnaasumik tamanut saqqummiussisimanera, Inatsisartut Ombudsmandiata aamma isornartoqartippaa.