Naalakkersuisoqarfinni pisortat soraartut ataatsimik ilaqqipput
Aalisarnermut, Piniarnermut Nunalerinermullu Naalakkersuisoqarfimmi maanna pisortap, Jens K. Lyberthip, Royal Greenlandimi pisortaaneq, Mikael Thinghuus, qaninnertut qullersarissavaa. Naalakkersuisoqatigiit Siumut pissaanermik marsip ulluisa aqqaneq-aappaanni tigusimmatali Jens K. Lyberth tassaalissaaq Naalakkersuisoqarfinni pisortat sisamaat allamik suliffittaartoq.
Jens K. Lyberth Royal Greenlandip Nuummi qullersaqarfiani katersuuffiussaaq, suliffissuaqarfimmillu avammut, kattuffinnut, pisortanut tusagassiuuteqarfinnullu attaveqarnermut akisussaasuussalluni.
- Jensi Royal Greenlandimi atorfeqalernissaanik akuersaartissinnaagakku nuannaarutigeqaara, pisortaaneq, Mikael Thinghuus, oqarpoq.
- Aalisarnermik inuussutissarsiorneq Jensip ukiorpassuarni misilittagaqarfigaa, taamaalillunilu Royal Greenlandip Kalaallit Nunaanni suliniutai annertusassavai, neriuutigisimasannillu tamanna annertuneroqaaq, Mikael Thinghuus aamma oqarpoq.
Tamanna aamma politikkikkut kissaataasunut, partiinit, minnerunngitsumillu Aalisarnermut, Piniarnermut Nunalerinermullu Naalakkersuisumit, Karl Lyberthimit, kissaatigineqartunut naapertuuppoq.
Naalakkersuisoqarfimmi maanna pisortaq 57-inik ukioqarpoq, ingeniøritut ilinniagaqartuulluni, Danmarkimi, Savalimmiuni, Tuluit Nunaanni Nunatsinnilu aalisarnermut tunngasunik ukiuni katillugit 17-ini atorfeqartarluni.
