Naalakkersuisoqarfimmi pisortaq tunuarpoq
Pisortamik nutaamik atorfinitsitsisoqarnissaata tungaanut Inuussutissarsiornermut Naalakkersuisoqarfiup pisortaa, Peter Hansen, pisortaagallassaaq.
Naalakkersuisoqarfiup pisortaata ingerlaannartumik atuutilersumik tunuarneranut patsisaasoq paasissutissiissutigineqanngilaq. Tusagassiuutinili nalunaarutip naggataani oqaatigineqarluni Aningaasaqarnermut Naalakkersuisoq, Vittus Qujaukitsoq, aamma Jan H. Lynge-Pedersen, pineqartoq pillugu oqaaseqarusunngitsut.
- Illuatungeriit tamanna isumaqatigiissutigaat, naatsumik taama allapput.
Jan H. Lynge-Pedersen, inuussutissarsiornermi aningaasarsiornermut ilinniagaqarsimasoq, Aningaasaqarnermut Sulisoqarnermullu Naalakkersuisoqarfimmi 2009-mi februaarip ulluisa aallaqqaataanni atorfinippoq. Tamanna sioqqullugu Nuna Oil-imi, Air Greenlandimi, aamma siusinnerusukkut Aalisarnermut, Piniarnermut Nunalerinermullu Pisortaqarfimmi atorfeqarpoq, soorluttaaq KNI A/S-imi siulittaasumut tulliusimasoq.
Tusagassiuutinut nalunaarummi naatsumik oqaatigineqarpoq, Naalakkersuisoqarfiup pisortaatut atorfik Jan H. Lynge-Pedersenip tunuarneratigut, aqqutit nalinginnaasut atorlugit inuttassarsiuunneqassasoq.
